На мяжы спыненыя 10 расейскіх аўтапаяздоў з павышаным радыяцыйным фонам
7- 27.02.2012, 17:25
Ва ўсіх выпадках павышаны фон радыяцыі ствараў хлорысты калій.
Як паведамілі БелаПАН у прэс-цэнтры Дзяржаўнага памежнага камітэта, у мінулыя выходныя пункт пропуску «Казловічы» на беларуска-польскай мяжы стаў своеасаблівым фільтрам для грузавых аўтамабіляў, якія накіроўваліся з Расеі ў Польшчу.
Беларусь кіроўцы праязджалі транзітам, аднак на мяжы было выяўлена 10 аўтамабіляў з перавышэннем дапушчальнай нормы радыяцыі. Прычым нарматыўны ўзровень у 0,2 мікразівертаў на гадзіну быў перавышаны ў дыяпазоне да 0,23 мікразівертаў на гадзіну. Ва ўсіх выпадках павышаны фон ствараў хлорысты калій.
Пасля правядзення праверкі з удзелам мабільнай групы радыяцыйнай і хімічнай бяспекі было прынятае рашэнне аб пропуску аўтамабіляў праз дзяржаўную мяжу ва ўсталяваным парадку.