«Белавія» могуць прадаць расейскаму «Аэрафлоту»

Беларусь можа прадаць расейскаму «Аэрафлоту» сваю адзіную авіякампанію «Белавія».

Пра гэта заявіў міністр транспарту Беларусі Іван Шчэрба.

«Уключаныя ў план прыватызацыі ў тым ліку нашыя авіякампаніі. Пераглядаць нешта мы не плануем. Мы толькі адно плануем - закупаць паветраныя судны, каб яшчэ больш працаваць на рынку авіяперавозчыкаў», - сказаў Шчэрба.

Па ягоных словах, прыватызацыя і продаж «Белавія» адбудзецца, хутчэй за ўсё, у 2013 годзе. Найбольшую цікавасць да авіяперавозчыка выказваюць расейскія кампаніі.

Той факт, што зараз разглядаюцца прапановы выключна ад расейскіх інвестараў, «Газеце.Ru» пацвердзіла і яе крыніца ў «Белавія». Яна таксама звярнула ўвагу на той факт, што нядаўна кітайскіх інвестараў адхілілі ад пачатага імі будаўніцтва новай УПП ў міжнародным аэрапорце Менск-2. Па словах крыніцы, гэта адбылося «ў выніку прамога ціску расейцаў».

Зараз найбольшую цікавасць да авіяперавозкі на беларускім напрамку дэманструе «Аэрафлот». Авіякампанія гатовая ўзмацняць сваю прысутнасць на заходнім кірунку, выціскаючы з рынку беларускага канкурэнта. Гэтаму, у прыватнасці, можа паспрыяць тое, што ў расейскага авіяперавозчыка нядаўна з'явіліся самалёты Sukhoi Superjet 100.

У 2012 годзе ўпершыню з 1980-х Беларусь плануе закупіць новыя, а не патрыманыя самалёты.

У канцы сакавіка паміж Масквой і Менскам разгарэўся авіяцыйны скандал. Авіязносіны былі перапыненыя 26 сакавіка з-за таго, што бакі не дамовіліся аб колькасці рэйсаў. 9 красавіка Масква і Менск вырашылі ўсе рознагалоссі і дамовіліся выконваць па пяць рэйсаў на дзень.