Лазавік не ведае аб вылучэнні кандыдатаў ад «Белай Русі»?

Сакратар ЦВК выказаў незадаволенасць з нагоды справаздачы БДІПЧ АБСЕ.

У дакуменце акцэнтуецца ўвага на тым, што «Белая Русь» мае намер вылучыць сваіх кандыдатаў практычна на ўсіх выбарчых акругах. На думку Лазавіка, гэта немагчыма. Тым часам прадстаўнікі «Белай Русі» ужо пачалі збор подпісаў за сваіх прыхільнікаў, піша ПЦ «Вясна».

«У справаздачы гаворыцца, што місія мае звесткі, што «Белая Русь» мае намер вылучаць сваіх кандыдатаў практычна ва ўсіх выбарчых акругах. Але ў адпаведнасці з беларускім заканадаўствам грамадскія аб'яднанні не маюць права вылучаць кандыдатаў у «дэпутаты». Такім правам валодаюць толькі палітычныя партыі», - заявіў чыноўнік.

Тым часам на афіцыйным сайце РГА «Белая Русь» паведамляецца, што ў Менску ўжо вядзецца праца па вылучэнні старшыні Завадской раённай арганізацыі Аксаны Няхайчык кандыдатам у «дэпутаты» «палаты прадстаўнікоў». Арганізаваны пікеты, вядзецца збор подпісаў.

Выбарчы кодэкс РБ дазваляе ўдзельнікам грамадскіх арганізацый вылучацца ў кандыдаты шляхам збору подпісаў або ад працоўных калектываў.

Старшыня арганізацыі Аляксандр Радзькоў у канцы чэрвеня заяўляў: «На пасяджэнні Рэспубліканскага Савета мы зацвердзілі план падрыхтоўкі ўдзелу арганізацыйных структур «Белай Русі» у выбарчай кампаніі-2012. У адпаведнасці з гэтым планам, мы будзем падтрымліваць кандыдатаў - членаў РГА «Белая Русь», а таксама тых, хто стаіць на блізкіх да нас канструктыўных пазіцыях. «Белая Русь» будзе вылучаць сваіх актывістаў для працы ў ініцыятыўных групах па збору подпісаў, для працы ў выбарчых камісіях усіх узроўняў, для працы даверанымі асобамі кандыдатаў, а таксама назіральнікамі ў выбарчыя камісіі ».

Дарэчы, у склад акруговых выбарчых камісій увайшлі 106 прадстаўнікоў РГА «Белая Русь».