Пераезд Чэрвенскага рынку перанеслі ўжо на канец года

Улады Менска спадзяюцца, што да 1 студзеня 2013 года прадпрымальнікі Чэрвеньскага рынку пераедуць на новую пляцоўку.

Пра гэта TUT.BY заявіла начальнік упраўлення гандлю і паслуг Менгарвыканкама Аксана Канстанціновіч.

«Мы плануем, што да 1 студзеня 2013 года Чэрвеньскі рынак пераедзе [на новую пляцоўку]», - сказала яна.

Па словах Канстанціновіч, новая пляцоўка ўжо заасфальтавана, вядзецца праектаванне размяшчэння гандлёвых павільёнаў. «Пасля таго, як аб'ект ухваляць санстанцыя і пажарнікі, прадпрымальнікі змогуць пачаць пераезд», - удакладніла яна.

Начальнік упраўлення гандлю і паслуг Менгарвыканкама перакананая, што больш тэрміны пераезду пераносіцца не будуць. «Працэс зацягнуўся з-за складанасцяў з правядзеннем зямельных работ. Цяпер гэта ўжо ў мінулым», - адзначыла Аксана Канстанціновіч. Праца з ж іранскім інвестарам, які мае намер узвесці шматфункцыянальны комплекс на гэтым месцы Чэрвенскага рынку, вядзецца згодна з устаноўленым планам, дадала яна.

Нагадаем, што дата пераезду прадпрымальнікаў Чэрвенскага рынку на новую пляцоўку ўжо пераносілася неаднаразова. Апошні дэдлайн быў прызначаны на 1 жніўня.

Новы адкрыты рынак размесціцца на месцы былога разваротнага тралейбуснага кальца на скрыжаванні вул. Маякоўскага і завулка Маякоўскага, недалёка ад Лошыцкага парку. Побач плануецца пабудаваць і невялікі бізнэс-цэнтр. Праект па стварэнні новай пляцоўкі для пераносу Чэрвенскага рынку рэалізуюць беларускія бізнес-саюзы.

На гэтым месцы Чэрвенскага рынку прадугледжваецца будаўніцтва шматфункцыянальнага грамадска-дзелавога і гандлёва-забаўляльнага комплексу. Інвестарам выступае іранская кампанія Didas. Адпаведны інвестдагавор паміж ЗАТ «Дзідас Інтэрнэшнл Груп» (Іран) і Менгарвыканкамам падпісаны ў лютым 2011 года. Тады іранскі інвестар заявіў пра гатоўнасць кампаніі ўкласці ў будаўніцтва комплексу каля 200 млн даляраў.