7 сутак за маску Лукашэнкі (Фота)

Віцебскі актывіст БХД Яўген Гуцалаў арыштаваны за заклікі да байкоту «выбараў».

Справу разглядала суддзя Кастрычніцкага райсуда Віцебска Іна Грабоўская. Яўген Гуцалаў не адмаўляў, што выказваў сваё стаўленне да ўдзелу ў «выбарах», - распавёў актывіст Пётр Іваноў, які прысутнічаў на судзе.

Адным з доказаў правапарушэння сталі фатаграфіі, размешчаныя на сайце bchd.info. На адной з іх была бачная унікальная татуіроўка на руцэ актывіста. Да таго ж яго дзеянні зафіксавалі відэакамеры, так як з плакатам «Байкот парламенцкіх выбараў 2012» і маскай Аляксандра Лукашэнкі хлопец фатаграфаваўся ў цэнтры Віцебску - на вуліцы Леніна і каля аблвыканкама, паведамляе «Радыё Свабода».

Сем сутак арышту Яўген Гуцалаў павінен адбыць у ізалятары часовага ўтрымання. Адны суткі ўжо залічаны ў тэрмін пакарання, так як затрымалі актывіста яшчэ ўчора, 18 верасня.

Затрыманне адбылося на ўчастку № 71 Віцебскай-Кастрычніцкай выбарчай акругі, дзе Яўген Гуцалаў быў назіральнікам.

За заклікі да байкоту яго асудзілі ўжо другі раз. 4 ліпеня тая самая суддзя Кастрычніцкага райсуда Іна Грабоўская двойчы аштрафавала Яўгена Гуцалава, затрыманага за распаўсюджванне ўлётак. Штраф у 3 базавыя велічыні ён атрымаў нібыта за брыдкаслоўе. За тое, што падчас затрымання ён нібыта не падпарадкаваўся патрабаванням вартавых правапарадку, яго пакаралі штрафам у 21 базавую велічыню. Агульная сума штрафу склала тады 24 «мінімалкі» - 2,4 мільёна рублёў.