Мінадукацыі: Школьнікам летам няма чаго рабіць

Міністэрства адукацыі думае над пытаннем скарачэння школьных вакацый на месяц.

Такое меркаванне выказаў у эфіры тэлеканала «Беларусь-1» першы намеснік міністра адукацыі Аляксандр Жук, паведамляе БелТА.

Па словах Аляксандра Жука, Беларусь - адна з нямногіх краін, дзе вельмі працяглыя вакацыі, у тым ліку летнія.

Напрыклад, у Германіі летнія вакацыі складаюць усяго 6 тыдняў. У Беларусі ж дзеці гуляюць больш 3 месяцаў.

«Узнікае пытанне: як правесці гэтае лета дзецям? Калі мы можам арганізаваць сёння аздараўленне на працягу месяца, то два месяцы бацькі заклапочаныя знаходжаннем дзяцей на вуліцах. Таму над гэтым пытаннем варта падумаць», - адзначыў першы намеснік міністра.