«Будоўля пяцігодкі» падобная на падбіты карабель прышэльцаў

Адкрыццё «Чыжоўка-Арэны», запланаванае на 7 лістапада, зноў пераносіцца.

Не дапамог нават суботнік, на якім аб'ект прыбіралі ўсім светам. «Салiдарнасць» зірнула, на якім этапе працы.

У поўным аб'ёме аб'ект будзе здадзены ў эксплуатацыю да 15 снежня, - напярэдадні паведаміў гарадскі кіраўнік Мікалай Ладуцька.

Зрэшты, не трэба быць прарокам, каб пераканацца ў нерэальнасці названых раней тэрмінаў здачы комплексу. Дастаткова прайсціся вакол будучага дзелавога палаца, зараз больш падобнага на падбіты карабель прышэльцаў.

Тое, што працы вядуцца ў аўральным рэжыме, відаць няўзброеным поглядам. Адна змена ідзе дамоў, другая - прыбывае. У «шанхайцы», якая вырасла каля арэны на час будаўніцтва, пастаянны рух. З комплексу выходзяць аддзелачнікі, электрыкі, дзесяткі чалавек працягваюць абліцоўваць фасады і займаюцца дахам. Укладваецца плітка і ўзводзіцца пастаянная агароджа...

На пытанне - ці паспеем да лістападаўскіх? - рабочыя рэагуюць, гледзячы, як на наіўнага дзіцяці.

- Раней вадасховішча замерзне, - скупа адказваюць будаўнікі, якія выйшлі на перакур, паміж зацяжкамі.

І ідуць да арэны, нібы гладыятары на апошні бой.