Каму дастаўся мільён ад Пефціева?

Выключэнне фірмаў алігарха з «чорнага » спісу ЕЗ - праца яго лабістаў.

Учора ЕЗ зняў санкцыі з пяці кампаній, якія належаць бізнесмену Уладзіміру Пефціеву.

У той жа час прадпрыемствы Юрыя Чыжа і Анатоля Цярнаўскага пакінулі ў «чорным спісе». Раней хадзілі чуткі, што Пефціеў прапанаваў мільён даляраў таму, хто даможацца выключэння яго прозвішча з гэтага спісу, піша «Салідарнасць».

Санкцыі ў дачыненні да Уладзіміра Пефціева і трох кампаній падкантрольных яму - ЗАТ «Белтэхэкспарт», ЗАТ «Спорт-пары», ПУП «БТ Тэлекамунікацыі» Рада ЕЗ упершыню ўвяла 20 чэрвеня 2011 года. Бізнесмену быў забаронены ўезд у ЕЗ, а яго актывы ў краінах Еўразвяза маглі быць замарожаныя. У «чорным спісе» Пефціеў фігураваў як «галоўны эканамічны дарадца Лукашэнкі і ключавы фінансавы спонсар рэжыму».

Рашэнне Еўразвяза пра санкцыі Уладзімір Пефціеў аспрэчыў. Яго інтарэсы ў чатырох пазовах супраць Рады ЕЗ адстойвае лепшая літоўская юрыдычная кампанія LAWIN.

У 2012-м экс-кандыдат у прэзідэнты Алесь Міхалевіч са спасылкай на некалькі крыніц заявіў, што Пефціеў прапанаваў мільён даляраў таму, хто даможацца выключэння яго прозвішча з «чорнага спісу».

Напэўна гэтыя чуткі ў чымсьці маюць пад сабой падставу, лічыць палітолаг Валерый Карбалевіч.

- Можа, не мільён, можа, менш, - адзначыў аналітык. - Факт - гэта тое, што пэўныя людзі рабілі нейкія дзеянні для таго, каб прозвішча Пефціева знікла са спісу, лабіравалі яго інтарэсы. Таму цалкам можна давяраць гэтай інфармацыі.

Валерый Карбалевіч тлумачыць рашэнне Рады ЕЗ аб зняцці санкцый тым, што Пефціеў прадаў кампаніі ТАА «Дзелавая сетка», ЗАТ «Сістэмы інвестыцый і інавацый», ПУП «Сен-Ко», ПУП «БТ Інвест», «Тэхнасаюзпрыбор».

- Цяпер яны яму не належаць. Еўрапейская прававая сістэма дзейнічае на аснове права. Калі фармальна гэта ўжо не яго кампанія - значыць, на яе не павінны распаўсюджвацца санкцыі. Хоць не выключана, што дэ-факта Пефціеў па-ранейшаму з'яўляецца ўладальнікам гэтых кампаній.

Дарэчы, імя «былога зброевага барона» Уладзіміра Пефціева не аказалася ў першай дзесятцы ў штогадовым ТОП-200 самых паспяховых і ўплывовых бізнесменаў Беларусі. Хоць у леташнім рэйтынгу выдання «Ежедневник» ён быў нумар адзін у спісе.

Меркавалася, што Пефціеў страціў свае пазіцыі, паколькі прадаў долю ў кампаніі «Белтэхэкспарт». Пасля СМІ пісалі: «Знаходзіць пацверджанне версія, згодна з якой, Уладзімір Пефціеў перааформіў «Белтэх Холдынг» на добра знаёмага чалавека і такім чынам спрабуе сысці ад санкцый Еўразвяза».

Выходзіць, што Пефціеў абвёў вакол пальца Раду ЕЗ?

- Па-першае, мы не ведаем, на самой справе ён валодае ці толькі фіктыўна прадаў, - удакладняе Валерый Карбалевіч. - Тут магчымыя розныя варыянты. Можа, ён сапраўды прадаў, вось як Керымаў спрабуе прадаць «Уралкалій». Таму я б не рабіў такіх высноў. Але меркаваць мы можам.

- Калі выказаць здагадку, што сапраўды Пефціеў прадаў прадпрыемствы, каб вывесці іх з чорнага спісу, ці могуць рушыць услед яго прыкладу Чыж і Цярнаўскі?

- Цалкам верагодна. Чыж таксама распачаў намаганні, каб перааформіць некаторыя свае фірмы. Такія дзеянні робяцца, каб сысці ад санкцый. Пефціеў у гэтым зайшоў далей усіх. Я думаю, што тыя кампаніі, у дачыненні да якіх ёсць пагроза траплення пад санкцыі і якія супрацоўнічаюць з еўрапейскімі партнёрамі, праводзяць здзелкі праз еўрапейскія банкі, ужо распачалі меры, каб памяняць назву ці ўласніка. Варыянтаў, як можна сысці ад санкцый, шмат. Яны расказалі б вам значна больш пра гэта.