Генадзь Фядыніч: Продаж МАЗа не ўратуе яго ад краху

Эканамічная мадэль Лукашэнкі не проста дала расколіну, а прывяла ў нікуды.

Пра гэта заявіў старшыня прафсаюза радыёэлектроннай прамысловасці (РЭП) Генадзь Фядыніч, каментуючы сайту charter97.org спыненне вытворчасці на Менскім аўтазаводзе.

«Рабочыя ўжо даўно павінны выходзіць на забастоўку, таму што ўсе гэтыя ўгаворы бессэнсоўныя. Да гэтага яны працавалі па чатыры дні, а зараз з 24 студзеня па 7 лютага яны зусім не працуюць, акрамя аўтобуснага завода, таму што аўтобусы пастаўляюцца на ўнутраны рынак. Што тычыцца «МАЗаў», то яшчэ ў студзені-лютым іх зрабілі больш, а рэалізацыі няма. Таму, безумоўна, МАЗ ужо даўно павінен быў зрабіць рэструктурызацыю, яму патрэбныя інвестыцыі і зусім новыя тэхналогіі. Скажу шчыра, што на гэтым старым багажы далёка не з'едзеш», - падкрэсліў прафсаюзны лідар.

Генадзь Фядыніч адзначыў, што на Менскім трактарным заводзе рабочым не павысілі зарплату нават з улікам інфляцыі.

«І можна сказаць, што тая эканамічная мадэль, якую так рэкламавала кіраўніцтва дзяржавы не тое што дала расколіну, яна прывяла ў нікуды. Таму ці здольны ўрад развярнуць гэтую мадэль у рынкавым кірунку? Думаю, што не», - перакананы ён.

Кіраўнік прафсаюза РЭП дадаў, што цяпер дзяржава ўсё больш залазіць у кішэні людзей, каб тым ці іншым шляхам забраць у іх грошы: падатак на аўто, падаражанне «камуналкі» і многае іншае.

«Нават калі сёння будуць прадаваць МТЗ або МАЗ, гэта не зменіць сітуацыю ў хуткім часе. Бо куды падзець людзей? Ніхто ж не будзе купляць прадпрыемства, дзе 18-20 тысяч рабочых. Пра гэта трэба было думаць раней», - лічыць Генадзь Фядыніч.

Нагадаем, флагман айчыннага машынабудавання практычна цалкам спыніў вытворчасць. У бягучым годзе Менскі аўтамабільны завод неаднаразова пераходзіў на чатырохдзённы працоўны тыдзень, некалькі пятніц лістапада прадпрыемства зноў прастойвала. Кіраўніцтва МАЗа асцерагаецца банкруцтва.

Па словах рабочых, склады завода перапоўненыя гатовымі аўтамабілямі, пакупнікоў на якія няма, так як на расейскім і міжнародным рынках попыт на беларускую прадукцыю вельмі нізкі. Адсутнічаюць у прадпрыемства і фінансавыя магчымасці закупіць матэрыялы і камплектуючыя для новых машын.