«Палатачніца» прапануе адмовіцца ад бясплатнай адукацыі

«Дэпутат» Святлана Шылава выступіла супраць бясплатнай вышэйшай адукацыі ў Беларусі.

У вышэйшай школе неабходна пачаць пераход з бюджэтнага фінансавання да бюджэтнага субсідавання. Такую прапанову, як паведамляе БелТА, 4 снежня падчас «парламенцкіх» слуханняў у «палаце прадстаўнікоў» выказала намеснік старшыні пастаяннай камісіі «палаты прадстаўнікоў» па ахове здароўя, фізічнай культуры, сямейнай і маладзёжнай палітыцы Святлана Шылава.

«Дзяржава будзе заказваць ў ВНУ месцы па запатрабаваных спецыяльнасцях, студэнт, які выбірае замоўленае месца, атрымлівае безадсоткавы крэдыт, які будзе пагашаны дзяржавай пасля адпрацоўкі студэнтам па размеркаванні», - патлумачыла Святлана Шылава.

Калі ў працэсе навучання студэнт адлічыцца або не адпрацуе пакладзенага тэрміна, то хай сам пагашае гэты крэдыт, лічыць «парламентар».

Такім чынам, усе ВНУ будуць у роўных умовах, працуючы па сістэме гасразліку. Гэта ўмацуе сістэму вышэйшай адукацыі, лічыць «дэпутат».