Цыгарэты падаражэюць ў некалькі разоў

Акцызныя стаўкі на цыгарэты ў Беларусі плануецца прыраўняць да расейскіх.

Кошты на цыгарэты ў Беларусі будуць расці. Пра гэта БелТА заявіў генеральны дырэктар Гродзенскай тытунёвай фабрыкі «Нёман» Юрый Чарнышоў.

Паводле яго слоў, у найбліжэйшай будучыні беларускі рынак тытунёвай прадукцыі чакаюць некаторыя перамены. Акцызныя стаўкі на цыгарэты ў Беларусі плануецца прыраўняць да расейскіх, у сваю чаргу Расея пасля ўступлення ў СГА будзе вымушаная павялічыць акцызы да ўзроўню еўрапейскіх краін, членаў гэтай арганізацыі. Пры гэтым кіраўнік прадпрыемства адзначыў, што павелічэнне акцызнай стаўкі больш, чым на 20%, якое адбылося ў рэспубліцы ў студзені гэтага года, не прывяло да зніжэння спажывання гэтай прадукцыі.

З іншага боку, у канцы 2012 года попыт на цыгарэты рэзка вырас. Прычынай такой сітуацыі была не колькасць курцоў, якая павялічылася, а спроба грамадзян набыць тытунёвыя вырабы «пра запас», паколькі аб будучым павышэнні коштаў ведалі ўсе.

Юрый Чарнышоў адзначае, што рэзкія ваганні акцызных ставак прыводзяць да ажыятажнага попыту, які змяняецца перыядамі зацішша. Паводле яго слоў, гэтая сітуацыя невыгодная ўсім гульцам рынка, таму выраўноўванне акцызаў неабходна праводзіць максімальна плаўна.

Нагадаем, у красавіку асобныя маркі цыгарэт у Беларусі з 1 красавіка падаражэлі ў сярэднім на 3,8% -5%.