Лукашэнка падзякаваў Ватыкан за наладжванне адносінаў з ЕЗ

Беларускі дыктатар падзякаваў Ватыкан за садзейнічанне ў наладжванні адносінаў з Еўразвязам і запрасіў Папу Рымскага ў Беларусь.

«Я проста абавязаны падзякаваць за добрае стаўленне да Беларусі, я ўдзячны Каталіцкай царкве, Ватыкану за тую падтрымку, якую вы аказваеце нам на міжнароднай арэне, перш за ўсё ў арганізацыі наладжвання адносінаў з Еўрапейскім звязам. Не важна, будзе ад гэтага вынік ці не. Але я ведаю, што вы гэтага вельмі хочаце», - заявіў Лукашэнка, сустракаючыся ў аўторак у Менску з Апостальскім нунцыем у Беларусі арцыбіскупам Клаўдыё Гуджэроцці, піша «Інтэрфакс».

Звяртаючыся да Апостальскага нунцыя, ён падкрэсліў: «Мы ніколі не сустракалі такога разумення і падтрымкі ад амбасадараў Ватыкана, як ад вас». «Пачынаючы ад кадраў, камплектавання кадрамі і заканчваючы тымі праблемамі, якія стаяць перад Царквой», - сказаў Лукашэнка.

Кіраўнік запэўніў, што «ўсё магчымае для Каталіцкай царквы ў Беларусі мы зробім, і, можа быць, нават немагчымае». «Думаю, няма тых пытанняў, якія мы не зможам вырашыць, таму што гэта (Рымска-каталіцкая царква - ІФ) самая вялікая канфесія ў Беларусі, другая па колькасці», - адзначыў Лукашэнка.

Ён таксама заявіў, што «Каталіцкая царква вядзе вельмі правільную палітыку, гуляе вядучую ролю ў працы з насельніцтвам».

«Я ведаю, што многія кіраўнікі Ватыкана прытрымліваюцца вашай пазіцыі, некаторыя з іх жадаюць наведаць Беларусь. Будзеце ў Ватыкане, перадайце ім, што мы заўсёды з вялікім задавальненнем гатовыя іх прыняць тут», - адзначыў беларускі кіраўнік.

Нагадаем, 27 красавіка 2009 года Папа Рымскі Бенедыкт XVI прыняў Лукашэнку з малодшым сынам у Ватыкане. Асабістая аўдыенцыя працягвалася 25 хвілін. Тады Коля Лукашэнка падарыў Папу Рымскаму буквар на расейскай мове.

У сакавіку 2013 года беларускі кіраўнік запрасіў новаабранага Папу Рымскага Францыска наведаць краіну.