Беларусь збіраецца заліць суседзяў «чарнілам»

Беларусь мае намер адмяніць квоты для вытворчасці алкагольнай прадукцыі на экспарт.

Для садзейнічання экспарту алкагольнай прадукцыі кватаванне аб'ёмаў яе вытворчасці будзе ажыццяўляцца толькі для пастаўкі на ўнутраны рынак, паведамляе прэс-служба Міністэрства па падатках і зборах Беларусі.

Гэтая норма будзе садзейнічаць экспарту алкагольнай прадукцыі. Яна ўтрымліваецца ў нядаўна прынятых абедзвюма «палатамі» «парламента» папраўках у закон «Аб дзяржаўным рэгуляванні вытворчасці і абароту алкагольнай, нехарчовай спіртазмяшчальнай прадукцыі і нехарчовага этылавага спірту».

Прыняты законапраект уключае і іншыя навелы. Напрыклад, для абароны айчынных вытворцаў уводзіцца забарона на вытворчасць алкагольнай прадукцыі з этылавага спірту, пладовых вінаматэрыялаў, зброджана-спіртаваных і спіртаваных сокаў замежнай вытворчасці.

«Для паляпшэння транзітнай прывабнасці рэспублікі законапраектам прадугледжваецца адмена абавязковага суправаджэння алкагольнай і іншай спіртазмяшчальнай прадукцыі, якая перамяшчаецца па мытнай працэдуры мытнага транзіту», - дадалі ў міністэрстве.

Адмяняецца і патрабаванне па абавязковаму суправаджэнню і маркіроўцы суправаджальных дакументаў кантрольнымі знакамі пры ўвозе і вывазе узораў і экспанатаў на выставы (кірмашы), для правядзення сертыфікацыйных выпрабаванняў, ацэнкі якасці і арганалептычных паказчыкаў алкагольнай прадукцыі, якая плануецца да пастаўкі.

Яшчэ адна новаўвядзенне - законапраект дае магчымасць ажыццяўлення заліку кошту зваротнай шматабаротнай тары, якая вяртаецца айчынным вытворцам, у кошт аплаты за адгружаныя алкагольныя напоі арганізацыям рознічнага гандлю.

Змены датычацца і рознічнага гандлю алкагольнымі напоямі. Напрыклад, забараняецца раздробны гандаль алкагольнымі напоямі па ўзорах па-за гандлёвым аб'ектам (а значыць, і ў інтэрнэт-крамах), а таксама аказанне паслуг па дастаўцы алкагольных напояў фізічным асобам.

«Мясцовыя выканаўчыя і распарадчыя органы надзяляюцца правам прымаць рашэнні аб абмежаванні на тэрыторыі адпаведнай адміністрацыйна-тэрытарыяльнай адзінкі часу продажу алкагольных напояў у дні правядзення выпускных вечароў, мерапрыемстваў, накіраваных на прапаганду здаровага ладу жыцця, прафілактыку п'янства і алкагалізму», - паведамляюць у прэс-службе.

Варта адзначыць, што ў Беларусі вырабляюцца і спажываюцца ў велізарнай колькасці «чарніла» - пладова-ягадныя віны.