Мясніковіч даручыў «пачысціць» спісы льготнікаў

Прынцыпы фармавання чаргі маючых патрэбу ў паляпшэнні жыллёвых умоў пераправерылі.

C такой заявай кіраўнік урада выступіў на семінары па пытаннях удасканалення будаўнічай галіны краіны ў Брэсце, паведамляе БелТА.

«Намі неаднаразова звярталася ўвага мясцовых уладаў на тое, што ёсць шэраг грамадзян, якія, хутчэй за ўсё, не маюць патрэбы ў паляпшэнні жыллёвых умоў, але тым не менш стаяць у чарзе, - адзначыў Міхаіл Мясніковіч. - У спісах павінны быць тыя людзі, якія сапраўды маюць патрэбу ў гэтым».

Разам з тым, па словах прэм'ера, у чаргу часцяком трапляюць тыя, хто штучна пагаршае свае жыллёвыя ўмовы, выкарыстоўвае іншыя нядобрасумленныя прыёмы.

«Мы ставім задачу, каб у першую чаргу вырашаліся пытанні атрымання жылля тымі грамадзянамі, якія рэальна ў гэтым маюць патрэбу», - заявіў Мясніковіч, паказаўшы на неабходнасць пераправерыць спісы маючых патрэбу.

Акрамя таго, паводле яго слоў, пакуль не заўсёды паспяхова вырашаюцца пытанні будаўніцтва жылля стандартных спажывецкіх якасцяў. «Так, хочацца, каб жыллё было павышанай камфортнасці. Але ўсё гэта звязана з коштам квадратнага метра, які аплачваецца чалавекам, - звярнуў увагу кіраўнік урада. - Трэба разгледзець пытанне аптымізацыі праектных, інжынерных рашэнняў, каб у грамадзян быў выбар. Той, хто мае абмежаваныя фінансавыя магчымасці, таксама павінен мець шанец абраць сабе кватэру».