Мары Лукашэнкі: Драндулет, АЭС і космас

Дыктатар распавёў, пра што марыць.

Рэалізацыя інвестпраекта па вытворчасці ў Барысаўскім раёне легкавых аўтамабіляў, абмяркоўвалася 14 студзеня на рабочай сустрэчы Аляксандра Лукашэнкі з прэм'ер-міністрам Міхаілам Мясніковічам і старшынёй Менаблвыканкама Сямёнам Шапірам, паведамляе прэс-служба кіраўніка.

«Перш чым размаўляць, можна сказаць: тое, пра што марылі многія беларусы і, перш за ўсё, я, адбылося, - сказаў Лукашэнка. - Беларускі аўтамабіль мы зрабілі разам з нашымі кітайскімі сябрамі і быццам бы, па маіх дадзеных, прыкладна 2,5 тыс. прадалі ў мінулым годзе. І попыт на падобны тып аўтамабіляў маецца не толькі ў Беларусі, але і за межамі нашай краіны».

Кіраўнік пацікавіўся наяўнасцю магчымых праблем у працэсе вытворчасці і рэалізацыі аўтамабіляў. «Вы выдатна разумееце, што мы, вырабляючы ў Беларусі з кітайскімі сябрамі гэты аўтамабіль, урываемся ў святая святых перш за ўсё Расеі. Мы будзем яго прадаваць па ўсім свеце, у тым ліку ў Расеі і Казахстане, - адзначыў беларускі дыктатар. - Мяне цікавіць сённяшняя рэакцыя расейскага аўтапрамаўскага лобі. Але, я так разумею, у Расеі гэты аўтамабіль атрымаў усе дазволы і сертыфікаваны. Мы маем магчымасць яго там прадаваць. У сувязі з гэтым - пытанне ўтылізацыйнага збору. Як яно вырашаецца? Думаю, што трэба і кітайскіх таварышаў да гэтага падключаць і вырашаць гэтую праблему, калі яна існуе».

«Справа нашага гонару гэты аўтамабіль вырабіць менавіта ў такіх аб'ёмах і ў тыя тэрміны, якія мы плануем», - падкрэсліў Лукашэнка.

«Аўтамабіль добры, ён карыстаецца попытам. Значыць, трэба яго вырабляць і прасоўваць. Больш за тое, нямала нашых буйных прадпрыемстваў атрымліваюць заказы на вытворчасць камплектуючых. Таму гэта вельмі важны навукаёмісты інавацыйны праект, і мы яго абавязкова павінны рэалізаваць», - сказаў ён.

Пры гэтым вытворчасць у Беларусі айчыннага легкавога аўтамабіля на ўзроўні сусветных стандартаў Лукашэнка паставіў у адзін шэраг з рэалізацыяй праектаў у сферы космасу і будаўніцтвам АЭС.

Паводле слоў Міхаіла Мясніковіча, у Барысаве ўжо рэалізаваны першы этап па стварэнні зборачнай вытворчасці магутнасцю 10 тыс. аўтамабіляў у год. У далейшым прадугледжваецца стварэнне экспартаарыентаванай вытворчасці магутнасцю 120 тыс. аўтамабіляў у год. Праект плануецца рэалізаваць сумесна з кітайскай кампаніяй «Джылі». «Мы выкарыстоўваем іх вопыт. Гэта вялікая, адна з вядучых кампаній, якая вырабляе некалькі соцень тысяч аўтамабіляў у год і мае дастаткова добрую рэпутацыю на рынках. У цэлым праект ацэньваецца прыкладна ў $650 млн, у тым ліку інвестыцыі ў асноўны капітал - каля $450 млн», - распавёў ён.

Урадам распрацаваны праект указа Лукашэнкі «Аб некаторых пытаннях арганізацыі вытворчасці легкавых аўтамабіляў». «Мы не спяшаліся з гэтым указам, таму што трэба было стварыць магутнасці па буйнавузлавой зборцы і паглядзець, як рэагуе рынак на яшчэ аднаго вытворцу легкавых аўтамабіляў», - сказаў прэм'ер-міністр.

Міхаіл Мясніковіч прызнаў, што ўмовы рэалізацыі няпростыя, так як толькі ў Расеі ў цяперашні час працуюць каля трох дзесяткаў прадпрыемстваў па зборцы легкавых аўтамабіляў. І ў гэтым плане неабходна працаваць як над скарачэннем выдаткаў, так і імкнуцца да таго, каб у Беларусі фармавалася максімальная дабаўленая вартасць, а адпаведна зарплата рабочых, падатковыя паступленні. Адначасова і у кітайскага боку павінна быць зацікаўленасць працаваць у Беларусі і сумесна вырабляць аўтамабілі.

«Тут не можа быць аднабаковай выгады. Праект павінен быць узаемавыгадным, і да гэтага мы імкнемся. Гэта закладзена ў аснове праекта ўказа», - падкрэсліў прэм'ер-міністр.

Што тычыцца пэўных цяжкасцяў, у тым ліку ўвядзення ў Расеі ўтылізацыйнага збору, Мясніковіч падкрэсліў, што «для таго, каб забяспечыць належны ўзровень даходнасці і канкурэнтаздольнасці, гэтыя пытанні будуць вырашацца і эканамічнымі, і палітычнымі метадамі».

Урад таксама паставіў задачу перад міністэрствам прамысловасці і непасрэдна перад сумесным прадпрыемствам па арганізацыі неабходнага сэрвіснага абслугоўвання аўтамабіляў. «Па якасных характарыстыках тут вялікіх пытанняў не павінна быць. Па крайняй меры, ад тых, хто набыў для асабістых або вытворчых мэтаў, сур'ёзных нараканняў мы пакуль не чулі», - адзначыў прэм'ер-міністр.