На БЧ зарабілі тэрміналы самаабслугоўвання
2- 25.01.2014, 8:32
- 4,913
Беларуская чыгунка ўвяла ў эксплуатацыю 4 тэрміналы самаабслугоўвання на станцыі Менск-Пасажырскі.
Тэрміналы прызначаныя для продажу квіткоў на цягнікі рэгіянальных ліній эканомкласа і гарадскіх ліній па банкаўскіх картках, паведамляе прэс-служба БЧ.
Новыя плацёжна-даведачныя тэрміналы ўсталяваныя пад інфармацыйным табло, размешчаным побач з 22-24 шляхамі. У выніку колькасць такіх прылад на станцыі Менск-Пасажырскі павялічылася да дзевяці. Акрамя таго, нядаўна на сталічным вакзале ў рэжыме тэставання пачаў працаваць транзакцыйны тэрмінал самаабслугоўвання, прызначаны для выдачы праязных дакументаў, аплачаных праз Інтэрнэт.
Уведзеныя ў эксплуатацыю тэрміналы прызначаны для працы па-за памяшканнямі. Яны маюць воданепранікальныя дысплей і клавіятуру, а таксама абаронены ад вандалаў корпус.
У прэс-службе расказалі, што ў гэтым годзе плануецца далейшае пашырэнне сеткі тэрміналаў самаабслугоўвання для продажу квіткоў на цягнікі рэгіянальных ліній эканомкласа і гарадскіх ліній па банкаўскіх плацежных картках. У першую чаргу імі будуць аснашчацца станцыі з вялікім пасажырапатокам. Гэтую працу прадпрыемства праводзіць з мэтай падвышэння якасці аказваемых паслуг і развіцця безнаяўных плацяжоў.
Упершыню паслуга продажу праязных дакументаў праз тэрміналы самаабслугоўвання была ўведзеная ў студзені 2012 года. У цяперашні час прылады дзейнічаюць на трох станцыях беларускай магістралі: Менск-Пасажырскі, Віцебск і Магілёў. Скарыстацца паслугай па рэалізацыі білетаў могуць трымальнікі плацежных картак усіх банкаў Беларусі. Камісійны збор пры куплі не спаганяецца.
У 2013 годзе праз плацёжна-даведачныя тэрміналы самаабслугоўвання на чыгуначных вакзалах у Менску і Віцебску было прададзена 137,7 тыс квіткоў на цягнікі.