Мытня: Інспектарам кожны дзень прапануюць хабары

Гомельская мытня не стамляецца дакладваць пра адпрэчаныя інспектарамі хабары.

Мяркуючы па выніках студзеня, міліцэйскія нарады і супрацоўнікі ўласнай службы бяспекі ездзілі на пункты пропуску як на працу - амаль кожны дзень. Замежнікі ўпарта «забываюць» банкноты ў дакументах. Учора ў Новай Гуце даць хабары мытнікам паспрабавалі малдаванін і ўкраінец, піша onliner.by.

Спачатку грамадзянін Малдовы, які на аўтамабілі Opel Vectra заязджаў у Беларусь, пакінуў у пашпарце 200 расейскіх рублёў. У пункце мяркуюць, што з дапамогай гэтай сумы ён планаваў прыпыніць для сябе дзеянне мытнага заканадаўства і бяспошлінна завезці ў Мытны саюз 20 літраў алкаголю.

У той жа дзень грамадзянін Украіны паспрабаваў з дапамогай $20 паскорыць афармленне свайго грузавіка. Падобныя дзеянні тут традыцыйна расцэньваюць як спробы даць хабар. Нягледзячы на колькасць папераджальных улётак, перамагчы непамятлівасць замежнікаў пакуль не ўдаецца.

За студзень мытнікі налічылі 25 такіх спробаў. За ўвесь мінулы год - 177.