Міт Ромні: Я б не даў Расеі права на правядзенне Алімпіяды

Былы кандыдат у прэзідэнты ЗША заявіў, што ніколі не даў бы Расеі права праводзіць у гэтым годзе Зімовую Алімпіяду.

Міт Ромні звязаў гэта з палітычнай пазіцыяй краіны, перадае «Голос Америки».

«Калі б рашэнне было за мной, я б не прагаласаваў за Расею як месца правядзенне Зімовай або Летняй Алімпіяды», - заявіў ён у інтэрв'ю FOX News.

«Аднак вырашаць не мне. Расея - буйны гулец на міжнароднай арэне. Яна мае права падаць заяўку. Тым не менш, гэта супярэчыць перакананням такіх людзей, як я, у сувязі з тым, як паводзіць сябе кіраўніцтва краіны і як гэта адлюстроўвае алімпійскі дух», - растлумачыў Ромні.

Міжнародны Алімпійскі Камітэт абраў Расею месцам правядзення Алімпіяды-2014 у 2007 годзе. Ромні даў зразумець, што яго стаўленне абумоўлена хутчэй палітычным становішчам у краіне, чым ад сумневаў у поспеху арганізацыйнага боку, хоць ён таксама выказаў здзіўленне з нагоды велізарных выдаткаў на Алімпіяду.

На пытанне аб тым, ці лічыць ён, што паводзіны расейскіх уладаў супярэчыць духу Алімпіяды, Ромні адказаў сцвярджальна. Ён нагадаў аб Алімпіядзе 1936 года ў Берліне, якая праходзіла пры Адольфе Гітлеры.

«Прысутнасць там Гітлера, безумоўна, супярэчыла алімпійскаму духу, - заявіў Ромні. - І, зразумела, падобнае можа здарыцца і ў наш час, гіпатэтычна або ў канкрэтным выпадку».

«На мой погляд, Расея не выяўляе асаблівай гатоўнасці да супрацоўніцтва на сусветнай арэне, - працягнуў ён. - У рэшце рэшт, Расея выступае за тое, каб прэзідэнт Башар аль-Асад застаўся ва ўладзе ў Сірыі. Расея занадта часта заступалася за Іран, абараняючы яго ад жорсткіх санкцый, якія былі неабходныя».

Ромні таксама нагадаў і пра тое, што Расея дала прытулак збегламу выкрывальніку спецслужбаў Эдварду Сноўдэну. «Мяркую, гэты крок быў прызваны дапячы нам», - сказаў ён.

Ромні, чыя паспяховая работа па арганізацыі Зімовай Алімпіяды 2002 года ў Солт-Лэйк-Сіці дапамагла яму двойчы, хай і беспаспяхова, балатавацца ў прэзідэнты, адзначыў, што ён не сумняваецца ў здольнасці расейскага прэзідэнта Уладзіміра Пуціна ператварыць чарнаморскі курорт у непрыступную крэпасць пасля нядаўніх тэрактаў у Валгаградзе, якія панеслі больш за 30 жыццяў.

«Выведвальная праца вядзецца за месяцы і нават гады да Алімпіяды, каб выявіць людзей, якія могуць прадстаўляць пагрозу. Мяркую, у Расеі прарабілі нядрэнную працу ў гэтай галіне, каб засцерагчы Алімпіяду ад большасці небяспечных людзей», - лічыць рэспубліканец.