У снежні тэхагляд прайшлі амаль 200 тысяч аўто

У канцы снежня на станцыі дыягностыкі прыехала на 85% машын больш, чым звычайна, заяўляюць у «Белтэхаглядзе».

Па словах спецыялістаў, асноўны ажыятаж прыйшоўся на перыяд з 15 па 31 снежня. Попыт павысіўся на 85%, калі многія аўтаўладальнікі вырашылі прайсці ТА да ўвядзення дзяржпошліны.

- 199 тысяч - гэта не такая ўжо вялікая лічба, - кажуць спецыялісты. - Але асаблівасцю стала тое, што большасць аўтамабілістаў прыехалі ў апошнія дні снежня. Тады дыягнастычныя станцыі працавалі на мяжы магчымасцяў, павялічылі графік і адмовіліся ад выходных.

У першыя дні 2014-га адбылося рэзкае падзенне попыту. Некаторыя кіроўцы, якія прыехалі на станцыі дыягностыкі, са здзіўленнем даведаліся аб увядзенні дзяржпошліны, піша onliner.by.

- Была некаторая блытаніна з аплатай дзяржпошліны ў першыя два дні, - дапоўнілі ў «Белтэхаглядзе». - Але цяпер сітуацыя нармалізавалася.

Раней спецыялісты прагназавалі зніжэнне колькасці аўтамабіляў на станцыях дыягностыкі да 40%. Многія кіроўцы падлічылі, што больш выгадна некалькі разоў аплаціць штраф, чым дзяржпошліну.