Папа Рымскі пагадзіўся з тэорыяй эвалюцыі
29- 29.10.2014, 19:29
- 10,794
Папа Рымскі Францішак заявіў аб адсутнасці супярэчнасцей паміж крэацыянісцкай тэорыяй паходжання свету і тэорыяй эвалюцыі.
Як паведамляе The Guardian, ён заявіў пра гэта падчас выступу ў Пантыфікальнай акадэміі навук.
Паводле слоў Папы Рымскага, Вялікі выбух, які, як прынята лічыць, паслужыў пачаткам развіцця сусвету, не выключае Боскай задумы, а, наадварот, мае на ўвазе яе.
«Эвалюцыя ў прыродзе не супярэчыць тэорыі стварэння свету, паколькі для эвалюцыі неабходныя жывыя істоты, якія будуць развівацца», - адзначыў Пантыфік.
Пры гэтым кіраўнік Рымска-Каталіцкай царквы перасцярог ад атаясамлівання Стваральніка з чараўніком, піша Lenta.ru.
«Калі мы чытаем кнігу Быцця, мы рызыкуем уявіць сабе Бога ў якасці чараўніка, які стварыў свет з дапамогай чароўнай палачкі і можа зрабіць усё што заўгодна. Але гэта не так. Ён стварыў жывых істот, каб яны маглі развівацца ў адпаведнасці з ўнутранымі законамі, якімі ён надзяліў кожную з іх. Толькі ў развіцці яны змогуць дасягнуць сталасці», - падкрэсліў Папа Францішак.
Папярэднік Францішка, Папа Бенэдыкт XVI, неаднаразова заяўляў, што з'яўляецца прыхільнікам тэорыі Боскага стварэння свету. У прыватнасці, ён заяўляў, што навуковы падыход зрабіў светапогляд людзей больш вузкім. Так, тэорыя эвалюцыі, на ягоную думку, не можа растлумачыць шэраг працэсаў, якія адбываюцца ў прыродзе, паколькі адказы на пытанні ляжаць па-за межамі навукі.