Самалёт «Аэрафлота» сеў у Менску праз бойку на борце

Дэбошы пасажыраў на расейскіх авіялініях становяцца традыцыяй.

Як паведаміў чытач «Беларускага партызана», у пачатку тыдня ў «Менску-2» здзейсніў вымушаную пасадку самалёт «Аэрафлота» праз бойку на борце самалёта.

Іншыя падрабязнасці невядомыя, паколькі кіраўніцтва Нацыянальнага аэрапорта прыклала намаганні, каб гэты інцыдэнт не стаў здабыткам грамадскасці.

Варта адзначыць, што дэбошы расейскіх грамадзян у самалётах даўно ўжо не рэдкасць. Літаральна на днях у Новасібірску экстранна сеў самалёт, які рухаўся з Іркуцка ў Маскву, праз бойку на борце двух п'яных пасажыраў. Адным з дэбашыраў, дарэчы, выявіўся дэпутат гарсавета з Калінінградскай вобласці.

Толькі ў кастрычніку паведамлялася як мінімум аб 10 падобных выпадках. Агулам за год гаворка ідзе аб некалькіх дзясятках.