Віктар Лукашэнка ездзіў у ААЭ на гонкі Формулы-1

Старэйшы сын дыктатара адпачыў ў Абу-Дабі.

У мінулыя выходныя памочнік кіраўніка ў пытаннях нацыянальнай бяспекі Віктар Лукашэнка наведаўся на этап чэмпіянату свету ў аўтагонках у класе Формула-1 у Абу-Дабі, а затым правёў перамовы з сябрамі кіруючай сям'і, паведамляюць мясцовыя СМІ.

Старэйшы сын Лукашэнкі стаў заўсёднікам этапу Формулы-1 у Аб'яднаных Арабскіх Эміратах. Ён ужо некалькі гадоў запар значыцца ў ліку ганаровых гасцей Гран-пры Абу-Дабі. Спецыяльнае запрашэнне наведаць Абу-Дабі паступае ад кіруючай сям'і эмірата. На гэты раз паназіраць за каралеўскімі аўтагонкамі з віп-ложы, прынамсі, прыязджалі прэзідэнт Сербіі Таміслаў Нікаліч, кіраўнік Чачэніі Рамзан Кадыраў, прэзідэнт Татарстана Рустам Мініханаў, піша tut.by.

Аднак аднымі аўтагонкамі знаходжанне старэйшага сына Лукашэнкі ў ААЭ не абмежавалася. У аўторак, 25 лістапада ён правёў перамовы з высокапастаўленымі мясцовымі чыноўнікамі. Прынамсі, Віктара Лукашэнку і "суправаджаючую яго дэлегацыю" прыняў віцэ-прэм'ер і кіраўнік МУС ААЭ генерал-лейтэнант шэйх Сейф бен Заід аль-Нахаян. Падчас сустрэчы, якая адбылася ў Галоўным штабе паліцыі Абу-Дабі, "бакі абмеркавалі шэраг пытанняў, якія ўяўляюць узаемную цікавасць, і шляхі ўмацавання стасункаў паміж дзвюма краінамі", сказана ў афіцыйным паведамленні паводле вынікаў перамоваў.