Афрыканскі кароль жыве ў ФРГ і кіруе племем праз скайп

Нядаўна яго пазбавілі сімвалаў улады.

У цэнтры Еўропы ўчынены дзёрзкі крадзеж княжых рэгалій з жытла 66-гадовага афрыканскага племяннога правадыра Тогбе Нгор’іфіі Сефаса Косі Бансы. Кіраўнік выявіў прапажу каштоўнасцей і знакаў сваёй улады, калі вярнуўся ў свой дом у Людвігсхафене-на-Рэйне.

Здабычай рабаўнікоў сталі чатыры кароны Бансы, а таксама залатыя ланцугі ягоных дзядоў, піша газета The Times.

Вядома, што Тогбе Нгор’іфія Сефас Косі Банса прыехаў у Нямеччыну ў 1970 годзе праз праграму студэнцкага абмену. Спадчынніку прастола племя Эве ў Гане так спадабалася гэтая еўрапейская краіна, што ён вырашыў застацца. Малады князь спачатку працаваў стажорам-механікам, а цяпер з'яўляецца ўладальнікам цэлай аўтамайстэрні.

У ранейшыя гады спадчыннік прастола таксама займаўся прафесійным боксам, а ў 1975 годзе стаў чэмпіёнам на мясцовых спаборніцтвах у самай лёгкай вазе.

На пасаду кіраўніка племя Банса ўступіў у 1992 годзе, калі памёр ягоны дзед. Карона магла дастацца бацьку або старэйшаму брату Тогбе, але яны былі ляўшамі, а законы племя абвяшчаюць, што ўладу могуць успадкаваць толькі праўшы. Таму каранацыяй быў ганараваны менавіта Банса, паведамляе InoPressa.

Новаму правадыру не хацелася пакідаць любімую Нямеччыну, аднак і адмаўляцца ад улады над супляменнікамі было б дзіўна. Акрамя таго, кіраўнік, які знаходзіцца ўвесь час за мяжой, можа прынесці свайму народу значна больш карысці, вырашыў Банса.

На дапамогу правадыру прыйшлі сучасныя тэхналогіі. Кароль асвоіў сацыяльную сетку Skype і цяпер кожную ноч праводзіць некалькі гадзін у інтэрнэце, вызначаючы племянную палітыку і разбіраючы спрэчкі паміж падданымі, якіх налічваецца 200 тысяч.

Раз у два месяцы Банса прыязджае на радзіму, прывозячы суайчыннікам інструменты. Ён таксама ўдзельнічае ў радзе правадыроў.

Фота: Getty Images