Рэчыцадрэў і Барысаўдрэў застануцца на плаву дзякуючы дзяржпадтрымцы
3- 31.12.2014, 20:04
- 7,536
Улады вырашылі дапамагчы двум прадпрыемствам дрэваапрацоўкі, падаўшы ім у канцы года бюджэтныя пазыкі з льготнай працэнтнай стаўкай.
Адпаведная пастанова зацверджаная ўказам №616 ад 25 снежня 2014 года, паведамляе АФН.
У прыватнасці, ААТ «Рэчыцадрэў» атрымала бюджэтную пазыку ў суме 100 млрд. рублёў са стаўкай 5% гадавых на «фінансаванне інвестыцыйнага праекта «Мадэрнізацыя вытворчасці драўняна-стружкавых пліт».
Вяртанне пазыкі будзе ажыццяўляцца з 1 студзеня 2018 года па 31 снежня 2019 года
У сваю чаргу, ААТ «Барысаўдрэў» атрымала бюджэтную пазыку ў суме 75 млрд. рублёў на «фінансаванне інвестыцыйнага праекта «Рэканструкцыя і развіццё вытворчасцей пліткавых драўняных матэрыялаў і лесанарыхтоўкі з укараненнем комплексу энергазберагальных мерапрыемстваў».
«...Пазыка даецца без уліку запазычанасці ААТ «Барысаўдрэў» у падатках, зборах (пошлiнах), iншых абавязковых плацяжах у бюджэт (у тым ліку ў дзяржаўныя мэтавыя бюджэтныя фонды), у дзяржаўныя пазабюджэтныя фонды (за выключэннем Фонду сацыяльнай абароны насельніцтва Міністэрства працы і сацыяльнай абароны), у бюджэтных пазыках (у тым ліку пралангаваным), пратэрмінаванай запазычанасці крэдытаў банкаў (асноўнага доўгу і працэнтах па ім), у тым ліку выдадзеных пад гарантыi Урада Рэспублiкi Беларусь, мясцовых выканаўчых і распарадчых органаў, а таксама без уліку невыканання гэтым таварыствам сваіх абавязацельстваў у выкананых гарантыях Урада Рэспублікі Беларусь, мясцовых выканаўчых і распарадчых органаў», - гаворыцца ў дакуменце.
Пазыка даецца пад 5% гадавых і будзе пагашацца з 31 студзеня 2018 па 31 снежня 2019 г.