Яцэнюк: Расея хоча стварыць новую Асецію ва Украіне

Але ўкраінскія ўлады не маюць намеру паддавацца на правакацыі.

Украіна патрабуе ад кіраўніцтва Расейскай Федэрацыі адклікаць свае войскі з Крыму. Пры гэтым, калі Расеі ўдасца справакаваць канфлікт у АРК, уся адказнасць за наступствы будзе ляжаць на кіраўніцтве РФ. Пра гэта заявіў прэм'ер-міністр Украіны Арсень Яцэнюк, адкрываючы сёння пасяджэнне ўрада, паведамляе ЛІГАБізнесІнформ.

Ён падкрэсліў, што ў Крыму мае месца неадэкватная прысутнасць расейскіх вайскоўцаў у парушэнне імі пагадненняў аб базіравання Чарнаморскага флоту РФ на тэрыторыі Украіны. Са слоў Яцэнюка, украінская ўлада расцэньвае гэта як правакацыю.

«У той жа час, да гэтага часу кіраўніцтву РФ не ўдалося справакаваць Украіну на прымяненне сілы. Мы ўсведамляем, што план складаўся ў тым, каб стварыць новую Асецію на тэрыторыі Украіны з ахвярамі і кровапраліццем...Мы не паддаемся на правакацыі, мы не ўжываем сілу, мы патрабуем ад кіраўніцтва РФ адклікаць свае войскі і вярнуць у месцы дыслакацыі», - адзначыў прэм'ер.

Яцэнюк падкрэсліў, што адказнасць за наступствы супрацьстаяння, якое можа быць справакавана радыкальнымі групамі пры падтрымцы РФ, будзе ляжаць на кіраўніцтве Расеі, якое дало ўказанне павялічыць вайсковую прысутнасць у Крыму.

Прэм'ер таксама паведаміў, што правёў перамовы з віцэ-прэзідэнтам ЗША, кіраўніком Еўрапейскай камісіі, канцлерам Нямеччыны і шэрагам міністраў замежных спраў ЕЗ: «Усе ўдзельнікі перамоваў заявілі аб сваёй падтрымцы тэрытарыяльнай цэласнасці Украіны і выступілі супраць умяшання ва ўнутраныя справы краіны».

Ён нагадаў, што на пасяджэнні Рады бяспекі ААН была прынятая пастанова аб стварэнні маніторынгавай групы і кансультатыўнага механізму паводле сітуацыі ва Украіне: «Увесь свет сочыць за падзеямі ў Крыме, і ўвесь свет выступае ў падтрымку суверэнітэту і тэрытарыяльнай цэласнасці Украіны».

Фота: Facebook/Арсень Яцэнюк