Джон Маккейн: ЗША павінны аказаць Украіне вайсковую дапамогу
46- 15.03.2014, 21:39
- 36,173
Сенатар ЗША ад Рэспубліканскай партыі Джон Маккейн выступае за вылучэнне Украіне вайсковай падтрымкі.
Пра гэта ён сказаў на прэс-канферэнцыі, паведамляюць «Украінскія навіны».
«Украіне неабходная праграма падтрымкі ў вайсковай сферы, уключаючы як зброю, якая дзейнічае на поўнае паражэнне, так і зброю для абароны. Рускія стаяць на межах Украіны. Сітуацыя вельмі напружаная. Свабодныя людзі, якія з'яўляюцца ахвярамі агрэсіі, імкнуцца абараніць свае дамы і выкарыстоўваюць вельмі сціплыя сродкі», - адзначыў Джон Маккейн.
«Думаю, нам трэба даць дапамогу. Я не хачу спараджаць марныя надзеі, але ёсць пэўныя рэчы, якія цалкам здзяйсняльныя», - дадаў сенатар. Таксама ён адзначыў, што ў ЗША занепакоеныя далейшым лёсам украінскіх вайскоўцаў, якія зараз знаходзяцца ў Крыме.
На яго думку, праз тое, што ўкраінскія вайсковыя аб'екты ў Крыме блакуюцца, вайскоўцы знаходзяцца ў небяспецы. Таксама Маккейн заклікаў Расею ўстрымацца ад агрэсіўных дзеянняў і паважаць гонар і годнасць украінскіх вайскоўцаў.