Як Януковіч жыве ў элітным пасёлку ў Падмаскоўі
38- 16.03.2014, 9:22
- 123,396
Збеглы кіраўнік знайшоў замену Межыгор'ю ў падмаскоўным элітным пасёлку «Сады Маендорф».
Расейскія журналісты знайшлі, дзе асеў экс-прэзідэнт Украіны пасля выгнання з краіны.
Як паведамляе выданне Собеседник са спасылкай на старшыню цэнтральнага савета партыі «Альянс зялёных - Народная партыя» Алега Мітволь, 26 лютага Віктар Януковіч стаў уладальнікам новай элітнай рэзідэнцыі ў кіламетры ад санаторыя Барвіха, які належыць кіраўніку справамі прэзідэнта РФ.
«Януковіч цяпер жыхар Падмаскоўя...І надвор'е кіеўскае...Можам павіншаваць нашых украінскіх братоў-бежанцаў з набыццём учора дома ў пасёлку Барвіха за 52 млн даляраў. Рублёўцы слава!!!», - Напісаў Мітволь у сваім Твітэры.
«Цяпер пасёлак прыватны, а раней ён быў часткай санаторыя Кіраўніцтва справамі прэзідэнта, - патлумачыў Мітволь. - Быў скандал з вывядзеннем зямлі з вядзення санаторыя. У 2001 годзе ўрад Маскоўскай вобласці перадаў 99 га ва ўласнасць ТАА «Кантры-Про» за 54 млн 450 тысяч рублёў, хоць іх рынкавы кошт складаў 52 млрд - амаль у тысячу разоў больш. Я прасіў Генпракуратуру вярнуць незаконна канфіскаваную зямлю, але там ужо паспелі набудаваць элітных асабнякоў, у якіх пасяліліся розныя ўплывовыя людзі».
Адным з такіх, са слоў Мітволя, і з'яўляецца цяпер Віктар Януковіч.
«Ён стаў жыхаром пасёлка за два дні да сваёй прэс-канферэнцыі ў Растове-на-Доне. Увечары гуляе там па сцяжынках і адчувае сябе як дома. А яго сяброўку можна сустрэць у гандлёвым цэнтры «Дрым Хаўс» на Рублёва-Успенскай шашы. Яна туды кожны дзень у «Азбуку густу» за прадуктамі прыязджае. Тая самая жанчына, якая на відэа з «Межыгор'я» ляцела з сабачкам на верталёце», - кажа Мітволь.
Са слоў Мітволя, новае жыллё Януковіча - гэта велізарны трохпавярховы асабняк у ангельскім стылі, з адпаведным прафесійным дызайнам, з ангельскай мэбляй. Папярэдні гаспадар не мог прадаць яго гады паўтара, быў гатовы аддаць нават за 35 мільёнаў даляраў, але нечакана атрымаў 52 мільёны, як і прасіў. Пакупнікі набылі аб'ект адразу без гандлявання. Галоўнай умовай было засяленне новага жыхара ў дзень пакупкі.
«Катэджны пасёлак «Сады Маендорф»- адно з нешматлікіх месцаў, якое цалкам адпавядае самому высокаму сегменту загараднай нерухомасці - Luxury», - расхвальваюць новае месца жыхарства Януковіча маскоўскія рыэлтары.
Сярод новых суседзяў экс-прэзідэнта Украіны - сястра лідара Азербайджана Ільхама Аліева, цесць Рамана Абрамовіча Аляксандр Жукаў, былы муж Крысціны Арбакайтэ Руслан Байсараў.
Прабрацца ў пасёлак журналістам не ўдалося нават пад выглядам куплі тут жылля. Спачатку ад іх запатрабавалі імя канчатковага пакупніка (вядомага бізнэсмэна ці палітыка), потым - яго пісьмовую даверанасць, затым - яго асабістую прысутнасць.