Барозу: На саміце ЕЗ будзе адобраная агульная рэакцыя на сітуацыю ва Украіне

Прэзідэнт Еўрапейскай камісіі Жазэ Мануэль Барозу ўпэўнены, што лідары ЕЗ прымуць рашэнне ў дачыненні да адзінай рэакцыі на крызіс ва Украіне.

"ЕЗ не прызнае (асобнае) існаванне Крыма. Мы будзем працягваць прыкладаць усе нашы намаганні для вырашэння бягучага крызісу мірным шляхам у ходзе перамоваў, паважаючы суверэнітэт Украіны. Я ўпэўнены, што на саміце ЕЗ мы адобрым сумесную еўрапейскую рэакцыю на сітуацыю", - сказаў Барозу на прэс-канферэнцыі напярэдадні адкрыцця саміту ЕЗ, перадае "Інтэрфакс-Украіна".

У гэтай сувязі Жазэ Мануэль Барозу выказаў асабістае меркаванне, што "неадкладна трэба прыкласці ўсе нашы намаганні, каб падтрымаць вартую даверу, стабільную, дэмакратычную і квітнеючую Украіну".

"Гэта - лепшы адказ, які мы можам даць. У той жа час, дзяржавы члены павінны паглядзець, як далёка мы гатовыя ісці, каб зрабіць абсалютна выразным, што такія паводзіны, якія мы бачылі нядаўна, непрымальныя, і будуць наступствы", - запэўніў прэзідэнт ЕК.