Віталь Рымашэўскі: Улады баяцца «Еўрапейскай Беларусі»

Актывісты грамадзянскай кампаніі «Еўрапейская Беларусь» падвергліся найбольшым рэпрэсіям у апошнія гады.

Такое меркаванне ў інтэрв'ю сайту charter97.org выказаў сустаршыня аргкамітэта ў стварэнні партыі «Беларуская хрысціянская дэмакратыя» (БХД) Віталь Рымашэўскі.

«Па-першае, я хачу адзначыць, што сёння людзей было як мінімум у два разы больш, чым у мінулым і пазамінулым годзе. Гэта была самая масавая акцыя з 2010 года. Відавочна, што людзей натхнілі падзеі ва Украіне, і беларускі народ рэагуе не так, як хацелася б Аляксандру Лукашэнку. Настрой быў вельмі святочным, было шмат моладзі. Таксама сёння пачаўся збор подпісаў супраць уцягвання Беларусі ў вайну. Я мяркую, што гэта знакавая падзея», - адзначыў палітык.

Сустаршыня БХД дадаў, што міліцыя паводзілася досыць нервова.

«Затрымалі прыкладна семярых хлопцаў са сцягамі з белым гербам «Колюмны» на чорным фоне. Нядаўна я даведаўся, што затрымалі хлопцаў з «Эўрапейскай Беларусі». Я мяркую, што гэта запланаваная акцыя менавіта супраць «Еўрапейскай Беларусі», бо і на мінулых мітынгах затрымлівалі яе актывістаў. Улады, безумоўна, баяцца ўплыву Андрэя Саннікава нават у выгнанні як самага жорсткага праціўніка Лукашэнкі. Мы бачым, што ў нашай краіне да розных арганізацый ставяцца па-рознаму, і найбольш рэпрэсіўным дзеянням у апошнія гады падвяргалася менавіта «Еўрапейская Беларусь», - падкрэсліў Віталь Рымашэўскі.

Нагадаем, у Менску масавымі затрыманнямі завяршылася шэсце ў гонар 96-й гадавіны абвяшчэння Беларускай Народнай Рэспублікі.