Менскае метро спыніў былы крымінальнік

Падазраваны ў СМС-мінаванні менскага метро раней прыцягваўся ў Казахстане да крымінальнай адказнасці.

Пра гэта паведамілі БелТА ва ўпраўленні Следчага камітэта па Менску.

Упраўленне Следчага камітэта па Менску працягвае расследаванне крымінальнай справы ў дачыненні да жыхара Менскай вобласці 1979 года нараджэння, які адправіў з мабільнага тэлефона паведамленне аб наяўнасці ў яго выбуховага прыстасавання і намеры падарваць яго ў Менскім метрапалітэне. "У ходзе расследавання ўстаноўлена, што падазраваны, ураджэнец Казахстана, раней на радзіме прыцягваўся да крымінальнай адказнасці. Жывучы ў Беларусі, ён злоўжываў спіртнымі напоямі, з'яўляўся асобай, абавязанай вяртаць расходы на ўтрыманне дзяцей, канфіскаваных з сям'і за неналежнае выкананне бацькоўскіх абавязкаў", - распавялі ва УСК.

З улікам устаноўленых у ходзе следства абставінаў, а таксама асаблівасцяў асобы падазраванага па справе прызначаная комплексная судовая псіхіятрычная экспертыза.

Менскае метро 26 лютага часова не працавала. Такое рашэнне было прынята, каб праверыць інфармацыю, атрыманую ад жыхаркі Менска аб тым, што яе ўвагу прыцягнула незвычайнае СМС-паведамленне аднаго з пасажыраў, у якім ён паведамляў пра намер прывесці ў дзеянне выбуховае прыстасаванне. Чалавекам, які адправіў гэтае паведамленне, як высветлілі праваахоўнікі, аказаўся 35-гадовы выхадзец Караганды (Казахстан), які пражывае ў Менскай вобласці. Упраўленне Следчага камітэта па Менску ўзбудзіла ў дачыненні да яго крымінальную справу аб заведама ілжывым паведамленні пра небяспеку. Акрамя таго, так як на час мерапрыемстваў, якія праводзілі праваахоўнікі, праца метро спынялася і быў вылучаны дадатковы наземны грамадскі транспарт, ТКУП "Менсктранс" і КУП "Менскі метрапалітэн" ацэньваюць памер шкоды, які быў нанесены такім незапланаваным змяненнем работы гарадскога пасажырскага транспарту.