JP Morgan раіць прадаваць расейскія акцыі

Банк знізіў рэйтынг расейскіх акцый да ўзроўню горш рынкавага.

Амерыканскі банк JP Morgan Chase & Co рэкамендуе інвестарам прадаваць акцыі расейскіх кампаній, піша Лiга.НЕТ.

Эксперты JP Morgan адзначаюць, што ў Расеі можа адбыцца скарачэнне попыту і інвестыцый за кошт зніжэння курсу рубля, паскарэння інфляцыі і зніжэння даступнасці пазыковых сродкаў. Акрамя таго, ва ўмовах замаруджвання эканамічнага росту павышэнне адсоткавых ставак з'яўляецца негатыўным фактарам для рынку акцый.

Нагадаем, 3 сакавіка, цэнтральны банк Расейскай Федэрацыі павысіў ключавую стаўку з 5,5% да 7% гадавых. У гэты дзень курс даляра да рубля вырас на 61 капейку - да 36,5 рубля (павялічваўся з раніцы да гістарычнага максімуму ў 37 рублёў), курс еўра рос на 92 капейкі - да 50,3 рубля (павялічваўся з раніцы да гістарычнага максімуму ў 51,2 рубля). Індэкс РТС абваліўся ніжэй псіхалагічнай адзнакі 1200 пунктаў - да мінімуму верасня 2009 года. Да 10:25 па маскоўскім часе падзенне індэкса склала 7,7%, ён упаў да 1169,88 пункта. Індэкс ММВБ знізіўся да гэтага часу на 6,57% - да 1349,25 пункта. Па выніках таргоў індэкс ММВБ абваліўся на 10,79% да 1288,81 пункта - мінімуму з чэрвеня 2013 года, а індэкс РТС упаў на 12,01% да ўзроўню 1115,06 пункта - мінімальнага ўзроўню з верасня 2009 года. Зніжэнне расейскіх біржавых індэксаў адбывалася рэкордна хуткімі тэмпамі з лістапада 2008 года. Капіталізацыя індэкса ММВБ па выніках таргоў 3 сакавіка знізілася на $61,3 млрд. Пазней стала вядома, што цэнтрабанк Расеі ў гэты дзень выдаткаваў на падтрымку курсу рубля $11,3 млрд.