Нацбанк забараніў крэдыты без даведкі аб даходах
9- 25.04.2014, 12:18
- 16,232
Без прадастаўлення даведкі аб даходах атрымаць крэдыты ў беларускіх банках цяпер немагчыма.
Пра гэта гаворыцца ў пастанове Нацбанка, апублікаванай на нацыянальным прававым інтэрнэт-партале.
У дакуменце прыведзены пералік дакументаў, якія могуць служыць доказам плацежаздольнасці пазычальніка. Гэта даведка аб памеры зарплаты, пенсіі, штомесячнага грашовага забеспячэння або адраснай сацыяльнай дапамогі, а таксама іншыя дакументы, якія пацвярджаюць атрыманне даходу.
«Дадзеная пастанова ўступае ў сілу пасля яе афіцыйнага апублікавання і дзейнічае да 1 траўня 2017 года», - гаворыцца ў заканадаўчым акце.
Чуткі пра тое, што банкі перастануць выдаваць крэдыты без даведкі аб даходах, з'явіліся яшчэ ў лютым. Тады банкіры казалі, што ў Нацбанку абмяркоўваюць увядзенне такой меры як абавязковай. Між тым, у Нацбанку тады падкрэслівалі, што рэкамендацый аб узмацненні жорсткасці патрабаванняў да выдачы камерцыйнымі банкамі крэдытаў фізічным асобам не давалі. Але не выключылі, што ў далейшым рэгулятар можа прымаць рашэнні аб умовах крэдытавання фізічных асоб, арыентуючыся на сітуацыю на валютна-фінансавым рынку краіны.