Болатава абвясцілі кіраўніком «Луганскай народнай рэспублікі»
9- 19.05.2014, 10:22
- 10,254
Сепаратыстаў на Луганшчыне ўзначаліў Валерый Болатаў.
Такое рашэнне прыняў "рэспубліканскі сход ЛНР", паведамляе са спасылкай на прэс-службу "Аб'яднанай арміі Паўднёвага Усходу" ZN.ua. Да гэтага Валерый Болатаў быў "народным губернатарам" Луганска. Ён таксама з'яўляецца камандзірам "арміі Паўднёва-Усходу".
"Рэспубліканскі сход "таксама зацвердзіў" часовую канстытуцыю рэспублікі". Кіраўніком сходу абраны Аляксей Каракін, а "прэм'ер-міністрам" - Васіль Нікіцін, які раней быў прэс-сакратаром паўднёва-усходняй арміі.
"Маімі першымі крокамі на пасадзе прэм'ер-міністра рэспублікі будзе фармаванне ўрада. Пра канкрэтныя кандыдатуры я заяўлю пазней. Склад кабінета будзе абвешчаны ў другой палове дня", - паведаміў Нікіцін.
Валерый Болатаў быў абвешчаны народным губернатарам Луганскай вобласці 21 красавіка на пасяджэнні народнага сходу ў захопленым будынку ўпраўлення СБУ ў Луганску.
11 траўня на тэрыторыі Луганскай вобласці сепаратысты правялі апытанне, названае імі "рэферэндумам", пасля чаго заявілі, што 96,2% прагаласаваўшых выказаліся за дзяржаўную самастойнасць рэгіёну і за стварэнне "Луганскай народнай рэспублікі".
12 траўня кіраўніцтва самаабвешчанай "дзяржавы" абвясціла пра яе незалежнасць.