У Менску забароняць запускаць цацачныя верталёты і шары

У перыяд ЧС абмяжуюць выкарыстанне паветраных шарыкаў і верталётаў-цацак.

У сувязі з правядзеннем чэмпіянату свету па хакеі з шайбай будзе абмежаванае выкарыстанне паветранай прасторы радыусам 50 км вакол Менска, паведамілі агенцтву "Інтэрфакс-Захад" у пятніцу ў прэс-службе УУС Менаблвыканкама.

"У гэты перыяд органамі забеспячэння бяспекі паветранага руху рэкамендуецца ўсім карыстальнікам паветранай прасторы, уключаючы пілотаў-аматараў, пры выкананні палётаў не парушаць устаноўленыя межы забароненай зоны, а па магчымасці ўстрымацца ад выканання палётаў", - адзначылі ва УУС.

"Дадзеная мера выкліканая, перш за ўсё, неабходнасцю забеспячэння бяспекі ўдзельнікаў чэмпіянату, заўзятараў, турыстаў, а таксама гасцей сталіцы, якія прыбываюць шматлікімі чартарнымі і планавымі авіярэйсамі ў аэрапорты Менска", - растлумачылі ва УУС.

"Акрамя таго, не так даўно на рынку радыёкіраваных цацак з'явіліся лятальныя апараты - квадракоптэры (верталёты), якія паспелі заваяваць вялікую папулярнасць сярод насельніцтва нашай краіны. У сваю чаргу іх выкарыстанне ў месцах правядзення масавых мерапрыемстваў і аб'ектаў чэмпіянату можа прывесці да выпадкаў траўмавання грамадзян. З мэтай выключэння падобных выпадкаў звяртаем увагу бацькоў на дадатковы кантроль па іх выкарыстанні дзецьмі і падлеткамі, асабліва напярэдадні і ў перыяд правядзення хакейных матчаў", - паведамілі ва УУС.

"Захаванню дадзеных элементаў забеспячэння бяспекі грамадзян праваахоўнымі органамі і органамі арганізацыі паветранага руху будзе нададзеная самая пільная ўвага", - падкрэслілі ў прэс-службе.

"Пераканаўча просім у перыяд правядзення чэмпіянату свету па хакеі выконваць дзейнае заканадаўства ў пытаннях выкарыстання паветранай прасторы, а таксама, па магчымасці, абмежаваць прымяненне ўсіх відаў авіямадэляў, радыёкіраваных цацак і запуск рознага роду паветраных шароў", - праінфармавалі ва УУС.

Нагадаем, супраць правядзення Чэмпіянату свету па хакеі ў Менску выступаюць праваабаронцы і міжнародныя арганізацыі. Ідэю пераносу турніру падтрымалі многія еўрапейскія і амерыканскія палітыкі. Некаторыя краіны прыгразілі байкатаваць чэмпіянат у выпадку яго правядзення ў Менску з-за рэпрэсій, якія ажыццяўляюць беларускія ўлады.