Менгарвыканкам: Загрузка дзіцячых садкоў складае больш за 130%
12- 26.05.2014, 15:59
- 10,624
У Менску вядзецца актыўная праца па вывядзенні першых класаў з дзіцячых садкоў.
Пра гэта паведаміў сёння на аператыўнай нарадзе ў мэрыі старшыня камітэта па адукацыі Менгарвыканкама Міхаіл Мірончык, перадае БелТА.
"Загрузка ўстаноў дашкольнай адукацыі ў Менску складае больш за 130%. Мы настойліва рэкамендавалі вывесці з дзіцячых садкоў першыя класы, якія не павінны размяшчацца на базе гэтых устаноў. Таксама праводзіцца тлумачальная праца з бацькамі, якія хочуць пакінуць дзяцей у садку да 7 гадоў. Што тычыцца праблемы з дзіцячымі садкамі ў мікрараёне Каменная горка, то змякчыць яе дапаможа адкрыццё пяці дашкольных устаноў", - сказаў Міхаіл Мірончык.
Паводле яго слоў, часта маладыя сем'і выказваюць жаданне аддаць у садок дзяцей, якія яшчэ не дасягнулі трохгадовага ўзросту, але так як сітуацыя з месцамі ў гэтых установах дастаткова напружаная, гэта становіцца немагчымым. Каб вырашыць праблему, спецыялісты разглядаюць пытанне стварэння ў Фрунзенскім раёне дзіцячага садка сямейнага тыпу.
"Гэта калі адна мама глядзіць не толькі сваіх дзяцей, але і малых з двух-трох шматдзетных сем'яў. Аднак знайсці маму-выхавальніка пакуль праблема, так як, уладкаваўшыся на працу, жанчына страціць права на атрыманне дзіцячай дапамогі. Вырашыць гэтае пытанне трэба сумесна з зацікаўленымі службамі і ведамствамі", - адзначыў старшыня камітэта па адукацыі.
Ён таксама распавёў пра ход будаўніцтва школы на скрыжаванні праспекта Незалежнасці і вуліцы Каліноўскага. "Праекціроўшчыкі ліквідуюць заўвагі, якія былі выказаныя МНС, выдадзенае праектнае рашэнне па ліўневай каналізацыі. На мінулым тыдні на аб'екце працавалі 380 чалавек, праца вялася і ў выходныя дні. Будтрэсту №1 была пастаўленая задача павялічыць колькасць чалавек на аб'екце да 600. Ёсць упэўненасць, што 1 верасня ў гэтай школе прагучыць званок", - паведаміў старшыня камітэта.