Адэская абладміністрацыі эвакуяваная ў чаканні штурму
2- 5.05.2014, 18:02
- 15,219
Будынак узялі пад абарону байцы Нацыянальнай гвардыі.
Пра гэта паведаміў на сваёй старонцы ў сацыяльнай сетцы «Фэйсбук» кіраўнік украінскага Цэнтра вайскова-палітычных даследаванняў Дзмітрый Тымчук.
«Паводле аператыўных звестак групы «Інфармацыйны Супраціў», у Адэсе сілавікі адэкватна адрэагавалі на магчымасць штурму аблдзяржадміністрацыі прарасейскімі тэрарыстамі, - піша ён. - Паводле папярэдняй інфармацыі, што паступіла, штурм АДА прызначаўся на 15 гадзін.
У экстранным парадку з АДА быў эвакуяваны персанал. Таксама былі спыненыя заняткі і эвакуяваныя дзеці з дзіцячых садкоў і школ у кіламетровай зоне ад АДА. Будынак АДА занялі і падрыхтаваліся да адбіцця штурму падраздзялення антытэрору і Нацыянальнай гвардыі».
Вайсковы экспэрт адзначае, што паводле стану на 17.30 штурм не пачаўся.
Нагадаем, 2 траўня ў Адэсе адбыліся сутыкненні - прарасейскія баевікі напалі на шэсце патрыётаў Украіны. Паводле звестак пракуратуры, падчас пятнічных сутыкненняў і пажару ў Доме прафзвязаў загінулі 46 чалавек, больш за дзвесце звярнуліся па дапамогу ў медыцынскія ўстановы.
Паводле звестак СБУ, сутыкненні і беспарадкі ў Адэсе з удзелам прадстаўнікоў незаконных вайсковых фармаванняў каардынаваліся з тэрыторыі непрызнанага Прыднястроўя дыверсійнымі групамі з РФ.
Пасля пятнічных падзей у Адэсе звольнены начальнік абласной міліцыі.