Арсен Авакаў: У Марыупалі знішчаныя 20 тэрарыстаў
8- 9.05.2014, 18:07
- 18,635
Значная частка тых, хто нападаў, схаваліся ў жылых кварталах горада.
У выніку правядзення антытэрарыстычнай аперацыі ў Марыупалі Данецкай вобласці каля 20 баевікоў знішчана. Яшчэ чацвёра ўзята ў палон. Пра гэта напісаў у сваім акаўнце ў сацыяльнай сетцы «Фэйсбук» міністр унутраных спраў Украіны Арсен Авакаў ў пятніцу, 9 траўня.
«Каля 20 тэрарыстаў знішчана, чацвёра ўзятыя ў палон. Значная частка тых, хто нападаў, пакідаўшы зброю, знікла ў жылых кварталах горада», - напісаў ён.
Авакаў паведаміў, што каля 60 чалавек, узброеных аўтаматычнай зброяй, атакавалі гараддзел міліцыі.
«Была спроба захопу будынка, без усялякіх папярэдніх патрабаванняў. У будынку адбыўся бой, які ператварыўся ў поўнамаштабнае баявое сутыкненне», - напісаў кіраўнік МУС.
Таксама ён паведаміў, што падчас сутыкнення загінуў украінскі вайсковец.
«Нашы страты - адзін забіты, пяцёра параненых. Удакладняюцца страты ў складзе ўзброеных сіл», - напісаў Авакаў.
Нагадаем, сёння сепаратысты пад кіраўніцтвам афіцэраў ГРУ Генштаба ВС Расеі захапілі аддзяленне міліцыі ў Марыупалі.
Фота: Reuters