Джозэф Байдэн: Дзеянні ўладаў Украіны правільныя і прафесійныя
1- 24.06.2014, 9:11
- 4,184
Пётр Парашэнка меў тэлефонную размову з віцэ-прэзідэнтам ЗША Джозэфам Байдэнам.
Падчас яе быў абмеркаваны працэс рэалізацыі мірнага плана. Пра гэта паведамляе прэс-служба Пятра Парашэнкі.
Джозэф Байдэн ацаніў дзеянні ўкраінскіх уладаў як правільныя і высокапрафесійныя.
Пётр Парашэнка са свайго боку заявіў, што спыненне агню з боку баевікоў павінна суправаджацца вызваленнем закладнікаў і закрыццём мяжы для прыпынення пранікнення на тэрыторыю Украіны наймітаў, зброі і наркотыкаў з расейскага боку. Парашэнка канстатаваў, што цяпер Расея павінна прадэманстраваць рэальныя крокі насустрач.
Прэзідэнт Украіны адзначыў, калі мірны план не будзе выконвацца, то ЗША і ЕЗ павінны зрабіць рашучыя крокі ў падтрымку Украіны, у прыватнасці пастановай Еўрапейскай Рады 27 чэрвеня. На думку кіраўніка дзяржавы, трансатлантычная салідарнасць у гэтым пытанні вельмі важная.
Байдэн паведаміў Парашэнку пра размову прэзідэнта ЗША Барака Абамы і прэзідэнта Расейскай Федэрацыі Уладзіміра Пуціна, якая была амаль цалкам прысвечаная ўкраінскаму пытанню.
У адказ прэзідэнт Украіны выказаў падзяку ЗША за падтрымку, у прыватнасці ў пашырэнні праграм супрацоўніцтва ў сферы бяспекі і абароны. Гаворка ішла аб адначасовых кароткатэрміновых захадах для надання тэрміновай дапамогі, а таксама доўгатэрміновых праграм для пабудовы інстытуцыйнай здольнасці ўкраінскага войска.
Падчас размовы віцэ-прэзідэнт ЗША таксама станоўча ацаніў прыцягненне да трохбаковага фармату перамоваў для імплементацыі мірнага плана другога прэзідэнта Украіны Леаніда Кучмы.