Беларускія медыкі не рэкамендуюць есці каўбасу кожны дзень

Каўбасу можна есці, толькі калі няма часу прыгатаваць што-небудзь іншае.

Пра гэта паведаміла загадчыца лабараторыі вывучэння статусу харчавання насельніцтва РУП «Навукова-практычны цэнтр гігіены» Кацярына Федарэнка падчас онлайн-канферэнцыі на сайце БелТА на тэму «Як палепшыць якасць беларускіх прадуктаў харчавання».

Паводле слоў Кацярыны Федарэнка, на сённяшні дзень каўбасныя вырабы складана вырабіць без харчовых дабавак, якія выконваюць пэўныя тэхналагічныя функцыі. «Яны ўжываюцца, дазволеныя для выкарыстання ў гэтым харчовым прадукце, але як лекар хачу заўважыць, што каўбасы не з'яўляюцца рацыёнаўтваральнымі харчовымі прадуктамі. Ні адзін лекар ніколі не будзе рэкамендаваць штодня ўжываць каўбасу, для харчавання дзяцей, аслабленых людзей, пажылых, людзей, якія пакутуюць ад нейкіх захворванняў, - сказала яна. - Каўбаса не павiнна быць у кожным прыёме ежы - гэта той прадукт, які можна ўжыць, калі няма часу нешта прыгатаваць».

У сваю чаргу генеральны дырэктар Навукова-практычнага цэнтра НАН харчавання Зянон Лоўкіс адзначыў, што зараз вырабляюць каўбасныя вырабы паводле тэхнічных умоў. «Мы ў нашай канцэпцыі «Навуковыя падыходы да стварэння беларускага брэнду - натуральнасць, якасць, канкурэнтаздольнасць» пазначаем, што гэта ўжо застаецца на сумленні вытворцы. Некаторыя хітруюць знізіць да гранічных значэнняў утрыманне мяса ў каўбасных вырабах і больш выкарыстоўваць дадаткі», - сказаў ён.

Навуковец дадаў, што плануецца ініцыяваць прапанову ў забароне вытворчасці прадуктаў паводле тэхнічных умоў і вярнуцца да распрацаваных раней стандартаў.

Нагадаем, падчас свайго звароту да народа і «парламенту» 22 красавіка Лукашэнка папракнуў беларусаў у тым, што яны ядуць бульбу з мясам на ноч.

«Я, вядома, многае і сам паспрабаваў. Але вы мяне прабачце, навошта есці мяса з бульбай? Навошта ты на ноч жарэш бульбу з мясам? Як ты будзеш спаць? Не ясі з мясам, з'ясі з селядцом», - заявіў ён.