Мінфін: Мясцовыя ўлады тармозяць працэс абарачэння акцый

Асаблівыя правы мясцовай улады па асобных акцыянерных таварыствах абцяжарваюць працэс продажу і абарачэння акцый у цэлым.

Пра гэта заявіў у «палаце прадстаўнікоў» першы намеснік міністра фінансаў Беларусі Уладзімір Амарын, адказваючы на пытанне «дэпутата» Вольгі Палітыка, перадае БелТА.

«Дэпутат» запыталася, чаму ў мінулым годзе ў Беларусі скараціўся выпуск акцый. «Гэта звязана з тым, што 72% акцый знаходзіцца ва ўласнасці дзяржавы. І мы самі ведаем, як асцярожна і ўзважана падыходзіць дзяржава да працэсаў продажу пэўных пакетаў акцый. Акрамя таго, існуюць заканадаўчыя нормы, якія, на нашу думку, варта неяк скарэктаваць. У Менгарвыканкама і аблвыканкамаў ёсць пераважнае права па пераліках пэўных акцыянерных таварыстваў у сферы сельгасперапрацоўкі і іншых сферах. Гэта таксама абцяжарвае працэс продажу і абарачэння акцый у цэлым», - сказаў першы намеснік міністра фінансаў.

У 230 таварыствах доля дзяржавы складае менш за 25%. «Гэтая доля нічога не значыць. Фактычна рашэнні ў гэтых таварыствах прымаюцца не дзяржавай, таму я лічу, што можна было б разгледзець і прыняць узважанае рашэнне па продажы гэтых доляў», - сказаў Уладзімір Амарын.

Ён прадставіў сёння ў Палаце прадстаўнікоў законапраект «Аб рынку каштоўных папер», які быў прыняты ў першым чытанні. Гэты дакумент дазволіць ствараць самарэгулявальныя арганізацыі прафесійных удзельнікаў рынку каштоўных папер. Гаворка ідзе пра добраахвотнае аб'яднанне, якое створана ў адпаведнасці з заканадаўствам у выглядзе некамерцыйнай арганізацыі. У праекце закона вызначаныя правы такіх арганізацый, а таксама ўстаноўленыя патрабаванні, якія прад'яўляюцца да іх.

Акрамя таго, дакумент змяшчае абноўлены гласарый, рэгулюе стасункі, звязаныя з эмісіяй, абарачэннем і пагашэннем эмісійных каштоўных папер, прафесійнай дзейнасцю на рынку каштоўных папер. Праект закона ўключае ў сябе і нормы, якія абараняюць правы і законныя інтарэсы інвестараў у гэтай сферы.

Для павышэння ўзроўню празрыстасці рынку каштоўных папер законапраектам больш дэталёва рэгламентаваная працэдура раскрыцця інфармацыі яго ўдзельнікамі - эмітэнтамі, прафесійнымі ўдзельнікамі, акцыянерамі, а таксама рэспубліканскім органам дзяржаўнага кіравання.