Рубінштэйн аб Навадворскай: Яна была чалавекам-эпохай
20- 12.07.2014, 20:34
- 23,985
Валерыя Навадворская здавалася вельмі нязручным чалавекам, якімі бываюць або вельмі маштабныя людзі, або дзеці.
Вядомы расейскі публіцыст Леў Рубінштэйн адгукнуўся на смерць Валерыі Навадворскай. Нататку, прысвечаную праваабаронцы, ён апублікаваў у сваім блогу на сайце grani.ru. Падаем яе цалкам:
- Памерла Валерыя Навадворская.
Яна была чалавекам-эпохай.
Да яе ставіліся, мякка кажучы, па-рознаму. Мне даводзілася мець стаснкі з людзьмі, якія ставяцца да яе як да прарока. Мне даводзілася бачыць і чуць тых, хто ўважаў яе ці не за свайго асабістага ворага. Хтосьці ўважаў яе за бажавольную. Камусьці здавалася яна смешнай. Але вось за нудную і манатонную яе не ўважаў ніхто.
Многім здавалася, што яна складалася з адных толькі рагоў, за якія ўвесь час чапляліся і аб якія балюча стукаліся тыя, хто праходзіў міма.
Яна здавалася вельмі нязручным чалавекам, якімі бываюць або вельмі маштабныя людзі, або дзеці. А ў ёй і праўда была зусім дзіцячая душа з яе верай у канчатковую справядлівасць, у тое, што дабро ў выніку абавязкова перамагае зло.
Лютасць і ціхамірнасць, не заўсёды прыемная шчырасць і прыязнасць - усё гэта разам, і ўсё гэта яна.
Сыход такіх людзей небяспечны з'яўленнем у грамадскай атмасферы велізарнай азонавай дзіркі. Цяжка і доўга гэтую дзірку давядзецца цыраваць. Але давядзецца, падзецца няма куды.
А яе неспакойная, няўрымслівая, палкая душа хай цяпер спачне.
Светлая памяць.