Юнкер: ЕЗ не будзе пашырацца бліжэйшыя пяць гадоў
13- 15.07.2014, 17:37
- 9,091
Еўразвяз не мае намеру прымаць новых чальцоў цягам бліжэйшых пяці гадоў.
Пра гэта заявіў у аўторак абраны кіраўнік Еўрапейскай камісіі Жан-Клод Юнкер, піша Інтэрфакс-Украіна.
"Бліжэйшыя пяць гадоў пашырэння (ЕЗ - ІФ) не будзе", - сказаў ён, выступаючы ў Еўрапарламенце.
На думку Ж.-К.Юнкера, "Еўразвязу трэба зрабіць паўзу ў працэсе пашырэння для таго, каб кансалідаваць намаганні наяўных 28 чальцоў".
Тым не менш, выбраны старшыня ЕК адзначыў, што Еўразвяз не мае намеру спыняць перамовы аб уступленні ў яго склад шэрагу краін, у асаблівасці балканскіх, якія "маюць патрэбу ў еўрапейскай перспектыве".
Акрамя таго, Ж.-К.Юнкер выказаўся за ўмацаванне партнёрскіх стасункаў з краінамі, якія мяжуюць з ЕЗ на ўсходзе, у прыватнасці Малдовай і Украінай.
Разам з тым, ён заявіў аб патрэбе ўмацаваць прысутнасць Еўразвязу на міжнароднай арэне ў якасці незалежнага гульца, адзначыўшы пры гэтым, што часцяком кіраўнікі МЗС краін-чальцоў "чыняць перашкоды" самастойнай дзейнасці ЕЗ.
"Мы не можам заставацца здаволенымі нашай цяперашняй замежнай палітыкай", - падкрэсліў Ж.-К.Юнкер.
Раней у аўторак дэпутаты еўрапейскага парламента на пленарнай сесіі ў Страсбургу таемным галасаваннем абралі былога прэм'ер-міністра Люксембурга Ж.-К. Юнкера старшынём Еўрапейскай камісіі.