67 хвілін добрых спраў у Дзень Мандэлы
3- 18.07.2014, 20:00
- 5,144
Упершыню свет адзначае дзень нараджэння паўднёваафрыканскага лідара без яго.
Сёння духоўнаму лідару і былому прэзідэнту Паўднёвай Афрыкі Нэльсану Мандэле споўнілася б 96 гадоў.
Рэдакцыя сайта charter97.org сабрала дайджэст пра тое, як ва ўсім свеце святкуюць першы Дзень Мандэлы. У сусветных СМІ паведамляецца, што людзі адзначаюць гэты дзень добрымі ўчынкамі цягам 67 хвілін.
«Менавіта столькі гадоў Нэльсан Мандэла выдаткаваў на служэнне свайму народу і ўсяму свету», - пішуць СМІ Паўднёвай Афрыкі.
Газеты паведамляюць, што акцыі добрых спраў праходзяць сёння ў Парыжы, Нью-Ёрку, Даласе, Лондане, Эдынбурге, Глазгаў, а таксама ў Кітаі.
Людзі наведваюць дзяцей у дзіцячых дамах, збіраюць кніжкі для школ і коўдры для бяздомных і нават стэрылізуюць котак. Таксама, у Паўднёва-Афрыканскай Рэспубліцы актывісты праводзяць курсы самаабароны ў праблемных раёнах. Актывісты заклікаюць усіх людзей, якія робяць сёння добрыя ўчынкі, дзяліцца фатаграфіямі на сваіх старонках у сацыяльных сетках.
Жанчына нясе партрэт Нэльсана Мандэлы ў Саўэта, ПАР (фота AFP/Gianluige Guercia).
Студэнты універсітэта ў Кейптаўне чыняць плот.
Чытачы мясцовай газеты дапамагаюць дзецям.
Гараджане чысцяць мясцовы парк.
Нагадаем, легендарны Нэльсан Мандэла пайшоў з жыцця ў ноч на 6 снежня 2013 года. Апошнія некалькі месяцаў ён змагаўся з ускладненнямі пасля лёгачнай інфекцыі. Мандэла, першы чарнаскуры прэзідэнт Паўднёва-Афрыканскай Рэспублікі, быў лаўрэатам Нобелеўскай прэміі міру.
Нэльсан Мандэла нарадзіўся 18 ліпеня 1918 г.. У маладосці ён узначаліў барацьбу з апартэідам у Паўднёва-Афрыканскай Рэспубліцы, за што 27 гадоў прасядзеў у турме. Пасля змены рэжыму ў краіне і прыходу да ўлады чорнай большасці Мандэла цягам пяці гадоў быў прэзідэнтам.
Спачуванні ў сувязі са смерцю легендарнага змагара ўжо ноччу сталі выказваць кіраўнікі дзяржаў і міжнародных структур: прэзідэнт ЗША Барак Абама, кіраўнік Еўракамісіі Жазэ Мануэль Барозу, прэзідэнт Еўрапарламента Марцін Шульц, кіраўнік МЗС Швецыі Карл Більт і іншыя.