Дванаццацігадовая дзяўчынка патанула ў Гарадзенскім раёне

Інцыдэнт адбыўся ўчора вечарам.

Гэта адбылося ўвечары 18 ліпеня. Калі група выратавання на водах МНС прыбыла да месца выкліку, дзіцяці на паверхні вады ўжо не было відаць. Праз некаторы час работнікі Асвода выявілі патанулую на глыбіні прыблізна 13 м, піша БелТА.

«Каб выкупацца, дзяўчынка 2002 нараджэння з Гародні з сястрой і сяброўкай прыехалі на грамадскім транспарце да кар'ера каля вёскі Пышкі Гарадзенскага раёна. На адлегласці прыкладна чатырох метраў ад берага, спатыкнуўшыся, яна ўпала і рэзка сышла пад ваду», - распавёў прэс-сакратар Міністэрства ў надзвычайных сітуацыях Беларусі Віталь Навіцкі.

Паводле звестак МНС, максімальная глыбіня затопленага крэйдавага кар'ера, дзе адбылася трагедыя, складае прыблізна 35-40 м.

У Міністэрстве надзвычайных сітуацый звярнулі ўвагу, што да такіх трагедый прыводзіць бестурботнасць бацькоў і блізкіх сваякоў. «Таму самае галоўнае правіла бяспекі дзяцей - гэта кантроль з боку бацькоў. Нельга адпускаць іх плаваць адных», - канстатавалі прадстаўнікі МНС. Нават адпраўляючыся на вадаём з дзіцем, трэба пастаянна кантраляваць сітуацыю: не дазваляць ныраць у незнаёмых месцах, песціцца на вадзе, купацца больш за 10 хвілін.

У Беларусі з пачатку года, паводле звестак Беларускага рэспубліканскага таварыства ратавання на водах, у вадаёмах патанулі 239 чалавек, з іх 14 непаўналетніх. Яшчэ 260 патэнцыйных ахвяр удалося выратаваць работнікам МНС, Асвода і выпадковым сведкам.