Парашэнка гатовы зноў спыніць агонь
33- 3.07.2014, 20:06
- 18,174
Прэзідэнт Украіны Пётр Парашэнка заявіў, што пры пэўных умовах гатовы вярнуцца да рэжыму спынення агню.
Пра гэта ён сказаў падчас тэлефоннай размовы з віцэ-прэзідэнтам ЗША Джозэфам Байдэнам, паведамляе прэс-служба кіраўніка дзяржавы.
Згодна з інфармацыяй, суразмоўцы абмеркавалі магчымыя далейшыя міжнародныя намаганні для падтрымання пазіцыі Украіны.
Парашэнка паведаміў аб выніках сустрэчы ў Берліне міністраў замежных спраў Украіны, Германіі, Францыі і Расеі і акрэсліў сваё бачанне наступных крокаў у рэчышчы дасягнутых дамоўленасцей.
Прэзідэнт Украіны падкрэсліў, што гатовы вярнуцца да рэжыму спынення агню, як толькі будзе пацверджанне аб ягоным выкананні ў двухстароннім фармаце, а таксама пры ўмовах вызвалення ўсіх закладнікаў і ўстанаўлення кантролю за мяжой з маніторынгам АБСЕ.
Кіраўнік дзяржавы падкрэсліў, што гатовы да пачатку змястоўных палітычных перамоў без якіх-небудзь дадатковых умоў.
У сваю чаргу Байдэн запэўніў, што ЗША падзяляюць і падтрымліваюць падыход прэзідэнта Украіны да ўрэгулявання сітуацыі ў гэты няпросты для краіны час і гатовыя прыкласці намаганні для дасягнення міру ў дзяржаве.
Прэзідэнт падзякаваў народу ЗША і павіншаваў віцэ-прэзідэнта з надыходзячым Днём незалежнасці, які Амерыка святкуе 4 ліпеня. «Украіна сёння змагаецца за сваю незалежнасць і ведае ёй цану», - адзначыў Парашэнка.