Еўрапейскі дыпламат: Санкцыі супраць Расеі пакінуць без зменаў
- 24.09.2014, 14:06
- 3,367
Верагодней за ўсё, на гэтым этапе ўведзены ўзровень абмежаванняў супраць Расеі зменены не будзе.
Пра гэта паведамляе «Укрінфарм» са спасылкай на высокапастаўленага еўрапейскага дыпламата.
«Разглядаюцца два варыянты: некалькі змякчыць рэжым санкцый, а таксама пакінуць абмежавальныя меры без зменаў. Наколькі паказваюць дыскусіі, шмат краін-чальцоў выказваюцца за працяг адсочвання сітуацыі на ўсходзе Украіны з адначасовым прасоўваннем палітычнага дыялогу з Расеяй», - адзначыў ён.
Паводле слоў еўрапейскага дыпламата, на сёння ў ЕЗ няма кансенсусу ў змене існуючых абмежаванняў.
Нагадаем, раней паведамлялася аб тым, што да канца месяца Еўрапейскі Звяз мае намер перагледзець санкцыі, уведзеныя супраць Расейскай Федэрацыі.
Чакаецца, што фармальная пастанова ў гэтым пытанні будзе прынятая 30 верасня на пасяджэнні COREPER (сустрэча прадстаўнікоў краін-чальцоў пры ЕЗ).