Федэрыка Магерыні: Расейскія санкцыі будуць падзеленыя на два пакеты
9- 14.01.2015, 16:49
- 16,507
ЕЗ залагоджвае Расею да выканання Менскіх пагадненняў.
Калі Масква будзе выконваць дамоўленасці, перастане ўмешвацца ў стасункі паміж Украінай і ЕЗ і прадоўжыць пастаўляць газ у Еўропу, будзе зняты пакет санкцый, звязаны з "дэстабілізацыяй" сітуацыі ва ўсходняй Украіне, заявіла вярхоўная прадстаўніца ЕЗ у замежнай палітыцы і бяспецы Федэрыка Магерыні, піша gordonua .com.
Служба замежнай палітыкі ЕЗ прапанавала зняць санкцыі і цалкам аднавіць супрацоўніцтва з Расеяй, калі спыніцца "дэстабілізацыя" сітуацыі ва ўсходняй Украіне, паведамляе EUobserver.
У дакуменце, які вярхоўная прадстаўніца ЕЗ у замежнай палітыцы і бяспецы Федэрыка Магерыні распаўсюдзіла сярод прадстаўнікоў дзяржаў-чальцоў ЕЗ 14 студзеня, гаворыцца аб прапанове аб'яднаць санкцыі ЕЗ у два пакеты: захады, звязаныя з далучэннем Крыму да РФ і, асобна, - з "дэстабілізацыяй сітуацыі ва Усходняй Украіне".
Магерыні мяркуе, што санкцыі, звязаныя з анэксіяй Крыму - чорныя спісы чыноўнікаў і забарона на інвестыцыі ЕЗ - павінны "заставацца ў дзеянні да той пары, пакуль захоўваецца анэксія".
Але эканамічныя санкцыі ў дачыненні да расейскіх банкаў і энэргетычных кампаній можна зняць, калі Расея будзе прытрымлівацца Менскіх пагадненняў, перастане ўмешвацца ў стасункі паміж Украінай і ЕЗ і прадоўжыць пастаўляць газ у Еўропу, мяркуе прадстаўніца ЕЗ.
Яна прапануе пачаць "нефармальны дыялог" паміж ЕЗ і Еўразійскім эканамічным саюзам Расеі ў тэхнічных пытаннях, такіх як мытны кантроль або транзіт тавараў, што прывядзе да "стварэння фармальных дачыненняў".
Магерыні бачыць магчымасць праводзіць сустрэчы прадстаўнікоў ЕЗ і Расеі "газавага кансультатыўнага савета" і "партнёрскага савета энэргетыкі", перамовы ў спрашчэнні візавага рэжыму.
Прадстаўніца ЕЗ уважае за магчымае абмеркаваць праблему змены клімату, аднавіць перадачу тэхналогій у рамках "Партнёрства для мадэрнізацыі" і абмен студэнтамі ў рамках навуковых праектаў "Erasmus" і "Гарызонт 2020".
У "доўгатэрміновай перспектыве" Магерыні кажа аб магчымасці ўвядзення бязвізавага рэжыму і "аднаўлення сустрэч на вышэйшым узроўні паміж Расеяй і ЕЗ".
На Мюнхенскай канферэнцыі ў пытаннях бяспекі, якая пройдзе 6-8 лютага, будзе абмяркоўвацца сітуацыя ва Украіне.
NАТO будзе прадстаўляць генеральны сакратар Енс Столтэнберг, Еўразвяз - прэзідэнт Еўрапарламента Марцін Шульц і вярхоўная прадстаўніца ЕЗ у пытаннях замежнай палітыкі і палітыкі бяспекі Федэрыка Магерыні.
Фота: AFP