Федэрыка Магерыні: ЕЗ ніколі не прызнае анэксію Крыма
3- 15.01.2015, 10:01
- 11,712
Брусэль ніколі не ўспрыме змены дзяржаўных межаў з ужываннем сілы.
Пра гэта заявіла высокая прадстаўніца ЕЗ у замежнай палітыцы і бяспецы Федэрыка Магерыні, піша «Еўрапейская праўда».
«Мы ніколі не прымем змены межаў сілай. Ні цяпер, ні ў гэтым стагоддзі, ні ў гэтым тысячагоддзі. Мы нават не дапускаем такой магчымасці», - адзначыла Магерыні на пасяджэнні Еўрапейскага парламента ў Страсбургу, беручы ўдзел у дэбатах, прысвечаных Украіне.
Яна таксама выступіла за захаванне цяперашняга ўзроўню санкцый супраць РФ у выпадку адсутнасці зменаў сітуацыі ва Украіне.
«Трэба дакладна казаць, што санкцыі звязаныя з сітуацыяй «на зямлі «. Таму санкцыі будуць мяняцца ў залежнасці ад гэтай сітуацыі - у бок змяншэння, павелічэння. Ці не будуць змяняцца, калі няма зменаў», - падкрэсліла прадстаўніца ЕЗ.
Адначасова Магерыні падтрымлівае далейшы палітычны дыялог з Масквой.
«Гэта не азначае, што мы не павінны размаўляць. Мы павінны гаварыць, і ўкраінцы з расейцамі таксама павінны гаварыць. І мая роля - дапамагаць у гэтых перамовах», - сказала яна.
Яна дадала, што пры перамовах можна займаць і жорсткую палітыку.
«Гэта не азначае, што я павінна быць мяккай. Але нават для таго, каб быць жорсткай, я павінна гаварыць», - дадала Магерыні.
Нагадаем, падчас гэтых дэбатаў кіраўнік камітэта Еўрапарламента ў замежнай палітыцы Эльмар Брок заявіў, што Еўразвяз не павінен нават абмяркоўваць магчымасць зняцця санкцый з Расеі.
Раней выданне The Wall Street Journal пісала, што ў ЕЗ падрыхтаваны дакумент, у якім прапануецца абмеркаваць шляхі нармалізацыі стасункаў з Расеяй. У тэксце гаворыцца, што Еўрапейскі Звяз мог бы значна змякчыць санкцыі і аднавіць перамовы з Расеяй, калі прэзідэнт Расеі Уладзімір Пуцін зробіць крокі да ўрэгулявання крызісу ва Усходняй Украіне, паведамляе газета.
Фота: Reuters