Вярхоўны суд пакінуў папярэджанне «Народнай волі» ў дзеянні

Газету могуць зачыніць ва ўсялякі момант.

23 студзеня Вярхоўны суд адхіліў пазоў газеты «Народная воля» да Міністэрства інфармацыі. Такую пастанову прыняла суддзя Алена Кастрама.

Прадстаўнікі выдання маюць намер абскардзіць гэтую пастанову ў касацыйным парадку, паведамляе БелапАН.

«Народная воля» патрабавала прызнаць несапраўдным папярэджанне, вынесенае 11 лістапада 2014 за артыкул Святланы Калінкінай «На ланцуг!». Артыкул прысвечаны ратыфікацыі дамовы аб Еўразійскім эканамічным саюзе. Аўтарка выказала ўласнае меркаванне аб магчымых «падводных камянях» дамовы. Аднак Міністэрства інфармацыі ўбачыла ў гэтым «распаўсюд недакладнай інфармацыі, якая ўводзіць чытача ў зман».

Гэта другое папярэджанне, вынесенае «Народнай волі» ў 2014 годзе. Са слоў прадстаўніка выдання ў судзе Андрэя Бастунца, калі суд пакіне яго ў дзеянні, у Мінінфарма з'явіцца магчымасць прыпыніць выхад газеты.

«Калі Міністэрства інфармацыі ставіла задачу прымусіць мяне пісаць асцярожней, то гэтага не будзе, - заявіла журналістам пасля абвяшчэння пастановы суда Святлана Калінкіна. - Я буду і далей пісаць пра тое, што ўважаю за патрэбнае і сацыяльна важнае. Калі міністэрства ставіла мэтай, каб «Народная воля» стала выданнем, якое піша пра сад і агарод, то гэтага таксама не адбудзецца».