Банкі аднаўляюць валютныя інтэрнэт-аперацыі

Банкі Беларусі аднаўляюць валютныя інтэрнэт-аперацыі праз карткі.

Альфа-Банк (Беларусь) інфармуе, што з 2 лютага 2015 аднаўляецца магчымасць безнаяўнай куплі замежнай валюты ў інтэрнэт-банку «Альфа-Клік» і ў мабільным банку «Альфа-Мабайл» з рахункаў у беларускіх рублях у межах зацверджаных лімітаў. «Такая пастанова прынятая ў працэсе паслядоўнага аднаўлення сэрвісаў дыстанцыйных валютна-абменных аперацый», - адзначылі ў Альфа-банку, дадаўшы, што працягнуць паслядоўнае аднаўленне працы іншых каналаў валютна-абменных аперацый з улікам стабілізацыі на фінансавым рынку, піша БелТА.

«Прыёрбанк» у сваю чаргу з 26 студзеня вярнуў магчымасць разлічвацца ў нацыянальным сегменце ў сетцы інтэрнэт рублёвымі аплатнымі карткамі.

Банк БелЗЭБ пачаў прадаваць замежную валюту праз рублёвыя карткі не толькі за межамі Беларусі, але і на яе тэрыторыі. Пры гэтым трымальнік дэбетовай карткі можа аплачваць тавары і паслугі, папаўняць і адклікаць дэпазіты, атрымліваць гатоўку ў замежнай валюце ў межах сумы, эквівалентнай Br3 млн у тыдзень на тэрыторыі Беларусі і Br15 млн у месяц - за мяжой, у тым ліку праз інтэрнэт-аперацыі па-за краінай - у межах Br10 млн у месяц. Такая пастанова, як адзначылі ў банку, прынятая з улікам устойлівага росту ўкладаў у нацыянальнай валюце, адаптацыі да новых умоў курсаўтварэння.

Як паведамлялася, беларускія банкі пачалі масава аднаўляць валютна-абменныя аперацыі праз карткі, выпушчаныя да рахункаў у беларускіх рублях, у тым ліку павялічваючы ліміты. Напрыклад, трымальнікі карт Тэхнабанка з 27 студзеня могуць здзяйсняць ў Беларусі расходныя аперацыі ў замежнай валюце ў межах $1 тысячы ў дзень.

Праўленне ЗАТ «МТБанк» прыняло пастанову аб павелічэнні лімітаў пры выкарыстанні рублёвых банкаўскіх карт за мяжой. З 26 студзеня трымальнікі такіх карт змогуць разлічвацца за пакупкі і паслугі на суму, эквівалентную Br7,5 млн у дзень. Гэта ж тычыцца і аперацый з замежнымі інтэрнэт-крамамі. Акрамя таго, праўленнем банка павялічаны тыднёвы ліміт разліку рублёвай карткай за мяжой, роўны Br30 млн. Ліміт на зняцце гатоўкі з рублёвых карт за мяжой усталяваны ў суме, эквівалентнай Br4,5 млн у дзень і Br15 млн у тыдзень.

Банк ВТБ з 27 студзеня павялічыў ліміт на здзяйсненне замежных валютна-абменных аперацый праз рублёвыя карткі Visa. Дзённы ліміт, які раней складаў 300 еўра, усталяваны ў памеры 500 еўра (для аперацый у іншых валютах - у эквіваленце). Даступныя аперацыі аплаты тавараў, паслуг і зняцця гатоўкі ў валюце, праінфармавалі ў банку, удакладніўшы, што зняцце гатоўкі ў расейскіх рублях немагчымае. ААТ «Банк Масква-Менск» таксама аднавіў валютна-абменныя аперацыі пры выкарыстанні картак банка, выпушчаных да рахункаў у беларускіх рублях.